Champhai District Bawrhsap sawn dodalna ah Champhai Sub-Hqrs. YMA tel zui an tum tawh lo

Champhai District NGO Coordination Committee-in tunhnaia Champhai District Bawrhsap Maria CT. Zuali sawnna thupek sut tura an hmalak zelna turah Champhai Sub-Hqrs. YMA an tel tawh dawn lo.

Thudawn danin Inrinni zan-a Champhai NGO Coordination Committee thutkhawmna-ah Sub-Hqrs. YMA hruaitute chuan an kal zelna tur chu a mimal thil deuh tawha an hriat avang leh Republic Day boycott chu YMA tel ve na chi-a an ngaih loh avangin tel zui an tum tawh loh thu an sawi a. Hetihlai hian NGO Coordination Committee a tel pawl dangte chuan kaltlangpui an tum ni a thudawn a ni.

Champhai Sub-Hqrs. YMA hruaitute chuan Central YMA hruaitute hnenah Chief Minister lo dawr tura an ngen ang leh an duhdan an sawi angin Bawrhsap insawn hun pawhsei a lo ni tawh a, YMA chu Pressure Group a nih loh avangin tun hnua tel zui zel chu an tan a rem lo ni a an hriat thu an sawi a ni.

Champhai NGO Coordination Committee hian an District Bawrhsap sawnna thupek sut tura sawrkar an nawrnaah Zirtawpni khan Champhai khawpui a dawr khartir-in hma an la tan a. An ruahman lawk ang chuan Vawiin, Thawhtanni hian Champhai khawpui a kawngzawh huaihawt a ni anga, naktuk-ah sawrkar Pisa zawng zawng khartir leh tumin tunkar Nilaini, India Republic Day-ah Total Bandh nei lehin Republic Day lawmna boycott an tum a ni.