Latest News

Serchhip District-ah Lok Sabha Inthlanpui atana inbuatsaihna kal mek thlirho a ni

Image
Lok Sabha Inthlanpui neih tur atan Serchhip District-ah inbuatsaihna kalpui mek a ni a, he Inthlanpui neih tur atana inbuatsaihna hrang hrangte thlir hian nimin khan Serchhip-ah District Election Offficer leh Bawrhsap David Lalthantluanga hovin Nodal Officer te chu an thukhawm a ni.

Chanchin thar lawrkhawm :

Bairabi-ah SDC Office hawng

Supply Minister leh Kolasib bialtu MLA K. Lalrinliana chuan nimin khan Rs. 55,65,163/- seng a sak Sub-Deputy Commissioner's Office, Bairabi chu a hawng a, Bairabi chu Mizoram luhka pawimawh tak, Rel chawlhmun awmna leh thenawm State nen a ram inrina hmun pawimawh tak a nih avangin Sawrkarin a ngaih pawimawh thu a sawi a. Sub-Deputy Commissioner's Office thar sakna tura hmalakna kalpui dan tarlangin, zirchianna te kalpui zawh a nih hnuah Sub-Divisional Office (Civil) thuthmun a hlankai leh thuai a nih theih nan ruahmanna siam a tul thu a sawi bawk.  Bairabi-a SDC Office hi Sept. ni 21, 2019 khan sak tan niin Ground Floor leh 1st Floor awmin SDC Office Chamber, Conference Hall, Rest Room 2, Record Room leh General Room a awm bawk. Bialtu MLA hian MLA Fund leh khawtlang tangkawp in an sak Bairabi Multipurpose Mini-Sports Complex chu a hawng nghal a, Basketball Court leh Volleyball Court a awm a ni.


Lunglei-ah Tomato chi sem

Agriculture Technology Management Agency (ATMA) Lunglei District buatsaihin nimin khan Lunglei-a Agriculture Conference Hall-ah Tomato chin dan zirhona leh a chi semchhuahna hun hman a ni a, Lunglei District-a Tomato chin tur hian a chi tha kum khata vawi hnih thar thei Arka Samrat ruahman a ni. Nimin a he hun hmanna ah hian ATMA in an District chhunga loneitu titha an thlanchhuah thin anga an thlanchhuah te hnenah Farmers Award  semna neih a ni a. Lunglei Block-ah C. Lalnunmawia, Serkawn; Bunghmun Block-ah Zosangliana, Thenhlum; Hnahthial Block-ah Lalengmawia, Cherhlun leh Lungsen Block-ah Vanlalnghaka Sailo, Lungsen te hnenah thuziak leh Rs. 10,000 hlan an ni.


Covid-19 No Tolerance Week

COVID-19 darh zel tur venna atana Mizo-ram sawrkar ruahman angin nimin atang khan Mizoram pumah COVID-19 No Tolerance Week hman niin mipui ten an zawm tha nia thudawn a ni.


LMC atan Post siam fel ta

Mizoram sawrkar chuan Lunglei Municipal Council (LMC) din tur atan hma la zelin UD&PA Department hnuaiah Post 5 a siam thar a. Hemi chungchanga sawrkar thuchhuah siamin a tarlan danin Chief Executive Officer, Secretary, Superintendent, Finance & Account Officer leh Assistant Post pakhat theuh siam niin Deputation a dah tur an ni dawn a. Chief Executive Officer hi State sawrkar hnuaia IAS, Junior Administrative Grade emaw, MCS-ah Selection Grade aia hniam lo emaw tur a ni.


Champhai-ah kawng zawh

Champhai NGO Coordination Committee ten Champhai DC sawn tura Order lo tihchhuah tawh sut tura sawrkar an nawrna kal zelah nimin khan Champhai-ah mipui thahnem takin kawng an zawh a, kawngzawh hi Champhai Vengsang Biak In tual atanga Bethel kawn thleng neiin mipui tam tak an tel a ni. Ruahman lawk ang chuan an thil ngiat hi a hlawhtling lo anih chuan Vawiin ah Champhai-a Sawrkar Office zawng zawng kharin naktuk-ah Total Bandh huaihawtin Republic Day boycott a ni ang.

Comments

Popular News (Last 30 Days)