TU THIAMLOH NGE?

TU THIAMLOH NGE?

- Dr. Zaichhawna Hlawndo

Zofate hian diknaa rorelna kan nghakhlelin kan riltam a, kan tuihal hle tih chu phat rual a ni lo

Kan tunlai boruaka roreltute demna leh rorelna dik duh avanga mipuite au thawm pawh a ring tha hle. Kan rama rorelna dik lo - thleibik neihna te, eirukna te leh thuneihna diklo taka hman te hi engtik atanga lo awm nge? Engtianga lo awm nge? Engtianga tihtawp tur nge? Tunge mawhphurtu ber? tih te hi ngun taka kan chhui loh chuan Chemtatrawta thawnthu ang mai kha kan ni dawn a ni. Tu thiamloh nge ti a kan zawnna lamah a thiamlo berah kan in puh kual a, tawpintai a nei thei lovang. A bul emaw, a zung ber kan phawi loh chuan a zar leh a hnah paih mahila a zualzapui vaihlenhlo tih ang chauh a ni ang. Sual hi a ler atanga do tur a ni lova, sual bul atanga do tur a ni. Tunah hi chuan uire deng hlum tur ang mai kan ni a, tuemaw hi denhlum mai kan duh a, mahse sualna neilo, kan ram sualna ah hian ka telve miahlo ti chiahin den tur ti ta ila, a deng hlumtu tur kan vang leh viau mai thei a ni.

Enge kan rama sual bul ber chu ni ta? Kan ram rorelna khawl kan siam dan Party Politics System bawlhhlawh tak hi sual bul chu a ni. He Party Politics Systema rorelna siam hi kan thlak hma chuan rorelna dik, Pathian duh dan leh mipui duhdana rorelna Zonun mawi parchhuahna tur hi a awm thei lovang. Kan ram roreltute hi tumah a hranpain misual bik an awm chuangin ka hre lo. A pawi ber chu Pathian nung bia inti si a India ram, milem biate Politics System hmangin lalna leh thuneihna inchuhin sum leh pai hmangin, diklo takin rorelna khawl kan din hi a ni. Mipuite ta nilo party ta tur sawrkar kan siam a, hei hi Pathian thu leh Zonunmawi kalh a ni.

Engtinnge kan siam that ang? Rorelna khawl ber a dikloh chuan rorelna dik chu a pawchhuak thei lovang tih kan hria a nih chuan rorelna khawl thar, Pathian Lal berna tur kan siam a ngai tihna a ni. Party politics hmanga rorelna dawhkan kan pekte khan mipui aiin party mi leh sa te tan hna an thawk a. Chu mai bakah Party Block leh Unit hruaitute, sum leh pai hmanga MLA an tlintheih nana campaign puitute, chhung leh khat leh hmelhriat ten thuneihna dawhkan hi kan ta emaw kan ti a ni ber mai. Roreltute lah chuan thuneihna an chan hmain chutianga tih sak tur chuan thute an lo thlung ve bawk si. Tuna rorelna an kalpui dan diklo kan tih zawng zawng te hi a nih dan tur zawka kan siam alawm ti pawhin a sawi theih ang. Party sawrkar, party lalna a nih tlat avangin.

Hunte leh hunbite neitu chuan a hnam thlante ah hian rorelna thar - Party Sawrkar ni tawh lovin Lal Isua Krista Lal ram sawrkar din a tum tawh a. Mihring lalna leh thuneihna ni tawh lovin, amah Lalpa Pathian chuan THLARAU THIANGHLIM hmangin a chhiahhlawhte kaltlangin ro min rel sak tawh dawn a ni. Mipuite i beidawng lovang u! Party tan nilo, Pathian leh mipuite tan Lalpa hriakthih te an lo ding chhuak dawn ta. Nehemia Jerusalem kulh chim rem rum din tha tura Lalpa tirh khan mipuite hnenah - ‘I thovang u khai i din teh tak ang u,’ a tih khan mipuite chuan “A NI TAK E, I THOVANG U KHAI I DIN THAR TEH TAK ANG U,” tiin Jerusalem kulh chim rem rum te chu an din thar ang khan, Zofaten lungrualin kan ram tluchhe mek tungding turin kan inpuahchah ta mup mup mai chu a nih hi. Zoram khua a VAR ngei dawn e.