Latest News

Serchhip District-ah Lok Sabha Inthlanpui atana inbuatsaihna kal mek thlirho a ni

Image
Lok Sabha Inthlanpui neih tur atan Serchhip District-ah inbuatsaihna kalpui mek a ni a, he Inthlanpui neih tur atana inbuatsaihna hrang hrangte thlir hian nimin khan Serchhip-ah District Election Offficer leh Bawrhsap David Lalthantluanga hovin Nodal Officer te chu an thukhawm a ni.

Chanchin thar thenkhat :

Minister in hnathawh mek en

Aizawl Dawrpui Veng-a Multi Car Parking-cum-Basketball Court sak mek chu nimin khan bialtu MLA leh Sports Minister Robert Romawia Royte chuan a hmunah tlawhin Tensile Roofing siam dan tur leh Gallery siam dan turte PWD hotute, Sports Department hotute leh Contractors te nen an endik a. He project hi cheng nuai 529-a zawh tura ruahman a ni a, a chhawng hnuai chu Parking tura siam zawh tawh niin, a chungah Basketball Court leh Gallery te a awm thung dawn a. Hall chung atan hian Mizorama la hman ngailoh Tensile Roofing hman a ni dawn a ni. He hna thawh mek hi PWD leh Contractor te chuan April 2022-a zo hman tura thawh an tum a ni.


ASHA te chawl rih dawn

All Mizoram ASHA (Accredited Social Health Activist) chuan National Health Mission hnuaia Scheme hrang hranga hna an thawhna lawmman (incentive) hun rei tak atanga an dawn tawh loh avangin February 1, 2022 (Thawhlehni) atang hian lungawi lohna lantir nan hna an chawlh-san rih dawn tih sawiin, an lawmman la dawn loh te kim a rang lama pe tura Mizoram sawrkar an phut thu leh an dawn kim hma chuan hna hi chawlhsan rih an tum thu an sawi bawk.


Party te inrawnkhawmna nei

Nimin chawhnu dar 1:00 khan Mizoram a Opposition Party te bakah Intellectual Circle atanga sawmbik te chuan Mizoram a Sawrkarna chelh mek te ah Constitution bawhchiatna leh Dan leh Thupek kenkawh kawng ah a hlawhchham avangin inrawnkhawmna hun neih a ni tih BJP Mizoram Pradesh chuan thuchhuah siama tarlangin, Dan leh hrai kenkawhna kawngah Mizo-ram Sawrkar a hlawhchham chian em avangin President Rule-a awm tura hmalak leh kan hma lawka Assembly Session lo awm tura Sawrkar rintawklohna (No Confidence) Motion putluh te chu mahni Party ah theuh sawiho tura thu dah a nih thu leh hun remchang hmasa ber ah thutkhawm leh tura ruahmanna siam a ni tih an tarlang bawk.


Thuchhuah siam tawh sut leh

Mizoram sawrkar chuan thuchhuah siama Office dawr duh tana Online Appointment tih hmasak ngai tura thupek a lo chhuah chu sut a nih thu nimin khan thuchhuah siamin a tarlang leh a. “Amaherawhchu, Office dawr tur te chuan kan zavaia him tlanna tura sawrkarin Covid Appropriate Behaviour leh Standard Operating Procedures a siam a piang te an zawm ngei ngei tur a ni,” tiin nimin-a thuchhuah siam ah hian an tar-lang tel bawk.


MPYCC ten hmalak an tum

Mizoram Pradesh Youth Congress Committee (MPYCC) chuan Mizoram sawrkar in kawlphetha chhit man tihsan nawn leh tumin, ‘February 20, 2022 thleng dodalna (objections) thehluh theih a ni’ tiin chanchinbu lamah tarlan a ni tih thuchhuah siamin an sawi a. Mipui har-sat leh retheih zual laia Electric Bill tihsan nawn leh tumna chu mipui thlavang hauhin nasa takin hma an lak tur thu leh mipui rawk tumna leh harsatna nasa zawk siam chu an dodal thu an sawi bawk.

Comments

Popular News (Last 30 Days)