Mizoram sawrkar in hri leng dona hmanrua a neih te chuan engemaw chen la daih dawn in lang mah se hmalam hun hriat a nih loh avangin a tul anga inlakkhawm a tul tih sawilan a ni.
Nimin khan Health Minister Dr. R. Lalthangliana hovin Aizawl-a SAD Conference Hall-ah COVID-19 hripui dona kal mek a thawktu Healthcare Frontline Worker te leh hmanraw hrang hrang dinhmun sawiho a ni a, he hunah hian COVID-19 hri kai kan pun chak leh tak avanga thawktu lama harsatna hrang hrang tawhte tarlan a ni a, volunteers 672 chhawr lai mekte thla hnih (2) dang chhawr chhunzawm sawrkarah dil mek a nih rualin volunteers dang 173 dil belh nghal a nih thu tarlan a ni a. Volunteers zingah hian Doctor, Staff Nurse, Data Entry Operator leh Group D Staff engemawzat an tel a ni. Mobile I-Lab viltu tur Lab. Technician 5 vel mamawh belh a nih thu tarlan a ni a, Sample lak tur a tam leh tak avang leh COVID-19 hri kaite enkawlna hmun a pun leh tak avanga thawktu lak belh leh vat chu a tul thu tarlan a ni.
Hei bakah hian hrileng dona hmanraw hrang hrang dinhmun pawh he hunah hian thlirho a ni a, tun dinhmunah chuan hmanraw neih ten engemaw chen an la daih hlawm dawn angin lang mah se hmalam hun hriat a nih loh avanga a tul anga inlakkhawm a tul thu tarlan a ni a, PHC 61 behchhana CCC siam tura ruahmanna awmin a kentel thil chi hrang hrang sawiho a ni bawk. Hmun hrang hrang atanga hripui dona hmanrua donation anga kan dawn te chuan nasa takin sawrkar phurrit a chhawk zangkhai tih he hunah hian tarlan ni bawkin lawmthu an sawi a ni.
Comments
Post a Comment