Damdawi In sakna tur hmun thlan fel thu an thlen

Serchhip District NGO Coordination Committee chuan Serchhip damdawi In (District Hospital) hmun tur an thlan fel tawh thu tunhnai khan Health Minister hnenah ziakin an thlen.

Tun thla ni 11-a Health Minister hnena lehkha an thehluh ah hian Serchhip District NGO Coordination Committee chuan Serchhip District Bawrhsap in District Hospital sakna hmun tur thlang fel tura a tih angin September 16, 2020 khan Joint VC aiawh, Serchhip Town chhunga VCP te nen an ngaihtuah hnuah lungrual takin ‘Chhiahtlang VC ramchhung a Bukpui ram, Power & Electricity Department ram leh ITI ram inkar hmun awl’ chu an thlang fel tih an sawi a. Helai hmun hi Sept. 19, 2020-ah NGO Corodination Committee Member te leh Town Area VC ten a hmunah an enfiah thu leh Hospital in a mamawh tur building hrang hrang a len bakah Helicopter tumna tur hmun zawl zau tak awmsa in tha an ti hle tih an tarlang a ni.

Serchhip District NGO Coordination Committee chuan nikum lama lehkha (Soft copy) an lo thehluh tawh chu Health Minister in a lo hmulo tih an hriat thu leh pawi an tih thu pawh an lehkha ah hian tarlangin, District mipui ten an mamawh District Hospital hi a rang lama din sak turin Health Minister chu an ngen bawk.