India Republic Day vawi 73-na Serchhip-ah Bawrhsap hovin hman a ni

India Republic Day vawi 73-na chu nimin khan hri leng karah ramchhung hmun hrang hrangah urhsun taka hman a ni a, Serchhip-ah pawh zing dar 9:00-ah Serchhip District Bawrhsap Nazuk Kumar IAS chuan India Hnam Puanzar pawtparhin mipuite hnenah thuchah a sawi a ni.


Serchhip DC Office tual-a India Republic Day puala inkhawm buatsaih ah hian District Bawrhsap Nazuk Kumar chuan mipui ten kan aiawha roreltu tur thlang thin ram kan nih theihna tura sulsutu ram hruaitu hmasa te leh India Danpui duangtu zawng zawngte zahna chibai a buk a, an remhriatna hlu tak zarah India ram chu khawvela mipuite rorelna ram lian ber, mitinte lenna, hnam hrang hrangte hlim tlang taka kan nun hona ram a lo ni ta tih a sawi a. “Zalen taka mipuite nungin hmasawnna chak takin a kal reng a, rorelna langtlang, felfai leh huapzo kan nei bawk a; kan vannei em em a ni,” tiin “Kawng tinrengah hmasawnna kan hmu a, Mizoram pawhin chak taka hma lam pan zel a, tunhnai lawka NITI Aayog in Sustainable Development Goals lama titha State a thlanna ah Mizoram dinhmun a tha hle a, Serchhip District pawh NE States zinga a titha thlan sawm (10) zingah a lang a ni,” a ti bawk.

Bawrhsap chuan kum kalta chhunga sawrkar hmalakna hrang hrangte he hunah hian tarlangin, Serchhip District Police ten kum kalta chhungin thubuai 111 ziaklutin mi 121 te man an nh thu leh thubuai 93-ah te chuan Chargesheet thehluh a nih tawh thu a sawi a. Excise & Narcotics Department te pawhin kum kalta chhungin ND&PS Act hnuaiah thubuai 34 ziaklutin mi 40 an man bakah MLP Act hnuaiah thubuai 280 ziaklutin mi 263 man an nih thu a sawi a. Serchhip Fire Station chuan mipuite atangin kangmei chungchangah vawi 31 zet kohna an dawn thu pawh sawiin, heng zinga 3 chu In kang leh a dang 28 te chu ram kang kaihhnawih ah a nih thu a sawi bawk.

Heng bakah hian COVID-19 hri leng meka Serchhip District dinhmun pawh Bawrhsap chuan tarlangin, COVID-19 Vaccine pek hna thawh tawh chin a tarlan bakah DCHC chu hawn a nih tawh thu leh mi 108 lai enkawl ni tawhin PSA Oxygen Plant pawh hawn tawh a nih thu leh Pathologist cum Sonologist pawh dah thar a nih thu a sawi.

Rural Development Department hma-lakna te tarlangin District chhungah MGNREGS Job Card 15,466 a awm mek thu leh kumin ah mipuite tan ni 85 inhlawhna siam a nih tawh thu a sawi a, PMEGP loan dil te zingah recommend turte thlan fel an nih tawh thu te, PMAY (Urban) Housing for All hnuaiah Serchhip Town chhunga chhungkaw 309 ten an In sak an zawh thawh thu te, DAY-NULM hnuaiah thalai 836 te Skill Training buatsaih sak an nih tawh thu te a sawi a. Thenzawl PHED Complex-a Plastic Waste Resource Management Centre chu hun reilote ah hman theih a nih tur thu a sawi bawk.

Heng bakah hian PMGSY hnuaia hma-lakna te pawh a tarlang a, P&E Department hmalakna hnuaiah Bukpui to Khawzawl via East Lungdar 132 KV line chu kum kalta ah hman theih tura hawn a nih tawh thu a sawi bakah sawrkar Department dang te hmalakna pawh a tarlang tel bawk a ni.

Serchhip-a India Republic Day lawmna ah hian sawrkar Department hotute leh khaw-tlang hruaitu thenkhat bakah thuthar thehdarhtute an tel a, hri leng avanga mi tam tak punkhawm a remchan loh avangin he hun hman hi Local Cable TV lamah live Telecast a ni a. Kumdang angin Damdawi In, Home leh Centre-ah te he ni pual hian thilpek hlan leh niin kum danga tih thin At Home Tea Party erawh buatsaih a ni lova, Bawrhsap hian Faina kawnga inelna lawmman a sem nghal bawk a ni.

Comments

Popular posts from this blog

Volleyball S/F khel dawn