ZPM Thalaite chuan MNF sawrkâr hnuaiah Dan rorelna leh dikna-in a lailum a luah zo tawh lo niin an sawi a. “Pathian leh kan ram tân titu MNF sawrkâr hi tun a chinah, sual dova thisen chhuak khawp hiala bei turin Zoram mipuite'n kan beisei a ni,” a ti bawk.
ZPM Thalai Hqrs. a General Secretary (Publicity Department) J. Lalramnghaka chuan nimin khan Aizawl Press Club-ah thuthar thehdarhtute kawmin Kuhva tawlh chungchang ah nimin khan Home Minister Lalchamliana chu hmuh an tum thu sawiin, COVID inkhuahkhirhna avangin Minister hi an hmu thei ta lo tih a sawi a. December 17, 2021 khan Esther Leihang, Executive Magistrate, Champhai District-in District Magistrate, Champhai hnêna Magisterial Investigation Report a thehluhah Champhai Police-te chuan Police Headquarters atanga Kuhva phur motor-te chu kaltlang tir tura hriattirna an dawn avângin kuhva phur motor-te an tihtawp theih loh thu Executive Magistrate hnenah hian an sawi tih a Report-ah hian chiang takin a ziak tih sawiin, he thil hi ZPM Thalaite chuan lungchhiatthlak an ti tih a sawi a ni.
Kuhva phurh titawp tura Central sawrkar hnuaia Ministry of Home Affairs-in order a lo chhuah vek tawh hnuah leh, Mizoram sawrkara Home Department-in chu Order bawhzuia Kuhva phur motor-te lo dang tura December 2, 2019-ah order a lo chhuah daih tawh laia, Police Headquarters atanga kuhva phur motor-te tlang tir tura thupek siam a ni leh si chu MNF sawrkâr hnuaiah Dan rorelna leh dikna-in a lailum a luah zo tawh lo tih a chiang hle niin a sawi bawk.
Champhai District Executive Magistrate-in District Magistrate hnena Magisterial Investigation Report a thehluh chu 'Pathian leh kan ram tan' titute sawrkârna hnuaia thleng atân chuan thil inhmeh lo tak nia a lan thu ZPM Thalai General Secretary chuan sawiin, “Pathian leh kan ram tân titu MNF sawrkâr hi tun a chinah, sual dova thisen chhuak khawp hiala bei turin Zoram mipuite'n kan beisei a ni,” a ti bawk.
.jpeg)
Comments
Post a Comment