Project Pushpak hotuten Governor an kawm

Border Roads Organisation (BRO) hnuai Project Pushpak hotute chuan nimin khan Governor Hari Babu Kambhampati chu Raj Bhavan ah hmuin Mizoram hmun hrang hrang, a bikin ramri hrula kawngpui an siam mek chungchangte an sawipui.

He inkawmna ah hian Governor Hari Babu Kambhampati chuan BRO in ram himna tura theihtawp an chhuahna leh ramri ven-himna atana tangkai kawngpui pawimawh tak tak an siam chu lawmawm a tih thu a sawi a. An hnathawh te tha taka chhunzawm tur leh an hna-thawhna harsatna an neih te pawh theih anga lo chinfel dan kawng zawnpui a tum thu a sawi a ni.

He hunah hian Project Pushpak-a Chief Engineer PN. Yadav chuan Project Pushpak hnathawh mek bakah BRO in kawngpui an enkawl mek chungchang a lem nen entirin a sawifiah a, tunah hian kawngpui 14, a vaia zawma a thui zawng KM 896-ah KM 757 chu BRO chuan an enkawl mek a. Heng te hi a pawimawh dan thliar hranga enkawl uluk deuh leh a then te phei chu enkawlna sum rawn lut tawh lo te a ni a. A bikin Mizoram chhim lamah kawngpui an siam mek te chu dah pawimawh deuh bik Prioty, 1A anga an enkawl mek a ni.

Kawngpui pawimawh tak siam tura rua-hmanna fel tawh re-alignment of Kawnpui – Durtlang – Aizawl leh kawngpui thenkhat Priority – 1B a awm mek te chu siam a tul tawh hle a, he kawngpui hi siam a nih theih na turin priority – 1A ah hlankai a ngai a. Hemi atan hian Governor chu theihtawp chhuahpui turin an ngen a. BRO te Camp nekchep zawnga mimalin ram an rawn chuh mek chungchangah Mizoram sawr-kar puina an ngen bawk a ni.

He hunah hian Col. P. Awasthi, Director (Works) leh Col. MK. Khullar, Director (Planning) te pawh an tel bawk a ni.