CAB zawm turin Health Minister in mipuite a chah

Health Minister Dr. R. Lalthangliana chuan thingtlang lamah COVID-19 hripui a darh nasa mek tih sawiin, Covid Appropriate Behavior (CAB) tha taka zawm turin mipuite a chah.

Health Minister hian Inrinni khan Lunglei District-a Buarpui tlangdung-a khaw 5- Buarpui, Kawlhawk, Sertlangpui, Lungdai ‘S’ leh Serte te tlawhin Primary Health Centre (PHC) leh Sub Centre te a tlawh bakah H&FW Department thawktute, khawtlang hruaitute leh tlawmngai pawl aiawhte nen inkawmhona an nei a. Heng hunah hian Health Minister chuan tun thla chhungin Mizoram-a Covid-19 vei hmuhchhuah zat pung chho mek zelin thingtlang lamah COVID-19 hripui a darh nasa mek tih a sawi a. Covid-19 hrileng do kawngah sawrkar Department hrang hrang te, Kohhran te, tlawmngai pawl te, khawtlang hruaitute leh mipuite kan tanrual chhunzawm zela theihtawp kan la chhuah tlan zel a tul a ni, tiin Covid Appropriate Behavior (CAB) tha taka zawm turin mipuite a chah a ni.

Health Minister chuan Mizoram chu India ram State te zingah Covid test titha leh ti tam ber te zinga mi kan nih thu leh tun dinhmunah test nuai 16 chuang tih tawh niin hei hi Mizoram population atanga chhut chuan 140% chuang a ni tih a sawi a. Mizorama Covid-19 case neih tawh zawng zawng chu 1,58,368 (22/01/22 - 7am report) niin kan positivity rate hi 10% vel a ni a. Testing kan tih tam avangin positivity rate pawh hi a sang lo theilo a ni, a ti a. Hri kai tam lam ai mahin nunna chan an tam leh tam loh ah hmalakna a that leh that loh hi min teh a, hetih kawngah hi chuan a ti tha kan nih thu a sawi a. Mizoram-ah Covid-19 avanga nunna chan mi 580 awm tawhin Death Rate 0.36% hi India rama hniam berte zinga mi a ni, a ti bawk.

H&FW hmalakna ti chak turin Infrastructure development leh thawktu lak belh kawngah nasa taka hmalak chhoh zel tum anih thu sawiin Health Minister chuan, tun dinhmunah Health Worker 400 leh Nurse 200 lak belh tura hmalakna a kal mek thu a sawi a. Thawktu lak belh tur te hi a nghet a lak nghal vek theih anih rih loh thu a sawi bawk.

Thingtlang khuaa Health Infrastructure leh Primary Health Care tih hmasawn chu a ngaih pawimawh hmasak thu sawiin Minister chuan, Mizoram-a Sub-Centre zawng zawng chu Health & Wellness Centre ah upgrade vek tum niin Health & Wellness Officer (B.Sc Nursing) ten an enkawl tawh dawn a ni, a ti a. Buarpui PHC chu tih changtlun zel tum niin khum pali awmna Covid-19 Isolation Ward sakna turin nuai 43 project DPR peihfel tawh a nih thu a sawi a. Bungtlang ‘W’ leh Lungdai ‘S’ khua ah te Health Clinic hawng turin Order tihfel anih tawh thu a sawi bawk.

Comments

Popular posts from this blog

Volleyball S/F khel dawn