Electric hman man tihsan a ni leh dawn

Consumer te i harh ang u XXXI :

Electric hman man tihsan a ni leh dawn

- Laldinpuia,
Secretary
Serchhip District Consumer Association

Kum 2021 April atangin sawrkarin Electric hman man a tisang a, mipui phun thawm a tam hle a, COVID-19 vanga inkharkhip laia bill sang bawk si chuan sawisel pawh a hlawh nasa hle. Mahse tihdanglam theih a ni tawh si lo, a mipui lam pawh lungawilo chungin kan ngawi ta rih niin a lang. Hetiang anih mek lai hian kum 2022 Financial Year thar (April) atanga Electric hman man hi tihsan a nih leh tur thu sawrkar chuan thuchhuah a siam leh ta a. He Sawrkar thuchhuak hi January 28, 2022 Vanglaini chanchinbu Page 7-ah chiang taka tarlan a ni.

Electric bill thara kan bill chawi zat a san dan tur hi mipui nawlpui ina kan hman chin hi a hriatthiam awlsam theih dan zawngin lo tarlang ila.

Mizoram mipuite hnena Electric eng petu leh bill khawntu Power & Electricity Department, Mizoram chuan kum 2022-23 chhunga mipuite hnena Electric Power Supply a pekna tur atana sum leh pai mamawh leh Electric hman man thar tur rawtna chu Joint Electricity Regulatory Commission (For Manipur & Mizoram)-ah a thlen a, JERC chuan hemi chungchanga Mizoram sawrkarin rawtna a thlen chu ‘Petition (ARR & Tariff) No. 3 of 2022’ tiin a lo pawm ta a.

Hemi rawtna anga mipui ten sawrkar kumthar atanga Electric Bill kan chawi tur leh tuna kan chawi lai mek khaikhinna chu a tlangpui hetiang hi a ni (Tuna tarlan hi mipui nawlpui connection ‘Domestic Category’ chauh a ni).

Tuna Tariff kan hman mek (Existing tariff (wef. 2021))

Unit Consume Energy Charge Fixed Charge

Unit Consume 0 – 100kWh Rs 4.80/kWh Rs 50 per CL in kW

Unit Consume 101 – 200kWh Rs 5.50/kWh Rs 50 per CL in kW

Unit Consume above 200kWh Rs 5.90/kWh Rs 50 per CL in kW

Tariff thar tura rawt (Proposed tariff (wef. 2022))

Unit Consume Energy Charge Fixed Charge

Unit Consume 0 – 100kWh Rs 5.10/kWh Rs 60 per CL in kW

Unit Consume 101 – 200kWh Rs 7.50/kWh Rs 60 per CL in kW

Unit Consume above 200kWh Rs 9.50/kWh Rs 60 per CL in kW

Electric hman man kumin sawrkar kumthar atanga tihsan anih tur chungchang thuchhuah hi thupek (order) a la ni chiah lova, rawtna leh hriattirna a ni. Chuvang chuan hemi chungchanga sawrkar rawtna sawisel duh tan chuan hun a la awm a. Sawrkar ina Electric hman man thar tur a ruahman hi pawm lo emaw, sawisel duh nei tan February 20, 2022 thleng hun hawn a ni a. He Tariff thar rawtna hi sawisel duh te chuan an pawm loh chhan leh an rawtna felfai taka ziakin an hmingpum leh address kimchang tarlangin an pawm loh thu emaw pawm har an tih lai emaw, rawt tur an neih emaw chu Ukil hriatpuia Affidavit siamin copy 5 an thehlut tur a ni. Chu rawtna chu Joint Electricity Regulatory Commission (JERC) for Mizoram & Manipur chuan a lo bawhzui ang a, pawm theihloh neite chu sawm tha a tih chuan hemi chungchang sawihona ni remchanga la ruat chawp turah a sawm thei ang. Rawtna nei duh kan awm anih chuan a rawt hunlai tak a nih hmel a, MCU, CYMA leh Political Party te tan chuan ngaihven hunlai tak a ni awm e.

Tuna ruahmanna awm mek hi sawrkar hian kaltlangpui ta se Sawrkar kum thara Electric bill kan chawi dan tur chu hetiang hian entirna i han pe chhin teh ang –

Entirna :

1. Kan bill ah Contracted load kha 0.3 kw ni ta se, thla khata i unit consumed kha 27 ni ta se, kan bill chawi zat tur chhut dan chu hetiang hi a ni ang –

a) Tuna rate awmlaiah :

(0.3x50 =15, 27x4.80=129.60, 15+129.60= Rs 144.6

b) Rate thar turah :

(0.3x60 =18, 27x5.10=137.7, 18+137.7= Rs 155.7


2. Kan bill ah Contracted load 2 nita se, Unit consumed ah 169 ni ta se, kan bill chawi zat tur chu-

a) Tuna rate awmlaiah :

(2x50=100, 100x4.80=480, 69x5.50=379.50, 

100+480+379.50=Rs 959.50

b) Rate thar turah 

(2x60=120, 100x5.10=510, 69x7.50=517.5,

120+510+517.5=Rs 1147.7


Tuna ruahmanna anga Electric hman man tihsan leh anih chuan kan bill chawi tur hi tuna kan chawi aiin a sanna hi Unit 100 chinah 6.25% te, Unit 200 chinah 36.36% leh Unit 200 chunglamah 61.02% te a ni. Electric hmang na deuh tan chuan sawrkar kum thar a kan bill chawi tur hi a kan bill kallai mek ai chuan a sang viau dawn a ni. Tuna tarlan hi Domestic Connection chauh a ni a, Commercial leh a dang te chu hei ai hian a bill chhutna rate hi a sang ang.

Comments

Popular posts from this blog

Volleyball S/F khel dawn