Latest News

Serchhip District-ah Lok Sabha Inthlanpui atana inbuatsaihna kal mek thlirho a ni

Image
Lok Sabha Inthlanpui neih tur atan Serchhip District-ah inbuatsaihna kalpui mek a ni a, he Inthlanpui neih tur atana inbuatsaihna hrang hrangte thlir hian nimin khan Serchhip-ah District Election Offficer leh Bawrhsap David Lalthantluanga hovin Nodal Officer te chu an thukhawm a ni.

Mizoram Police kum 50 tlinna (Golden Jubilee) lawmna Serchhip-ah urhsun taka neih a ni

Mizoram Police in kum 50 an tlinna, Golden Jubilee lawmna chu nimin khan Mizoram hmun hrang hranga Police ten dinna ah neih niin Serchhip-ah pawh 50th Mizoram Police Raising Day/Golden Jubilee lawmna hi SP Conference Hall-ah neih a ni.

Mizoram Police Golden Jubilee lawmna Serchhip-a neih ah hian Addl. SP Vanlalnghenga MPS chuan Mizorama Police lo awm tan dan tlangpui sawiin, kum 1871-a Mizoram-a Vailen vawi 1-na atangin Mizoram-ah Police te chanchin hi a intan thu leh hemi hnu hian British sawrkar in Police te hi a dah zui tak dan te a sawi a. India ramin zalenna a hmuh hnuah Mizoram chu Assam State hnuaiah awmin kum 1972-a Mizoram in Union Territory a hmuh hnuah Mizoram chuan ama pualin Police a neih tak thu sawiin, kum 1975-ah chuan ‘Mizoram Police Service’ (MPS) Batch hmasa ber pawh a lo neih tak thu a sawi bawk. Addl. SP chuan Police te chu nitin darkar 24 chhung hna thawk thin an nih thu pawh he hunah hian sawiin, hei vang hian inpawhna tha tak an neih thu a sawi bawk.

He hun kaihruaitu Serchhip SDPO Kaste Romalsawma chuan Serchhip District chhunga Police dinhmun leh an hmalakna tlangpui te he hunah hian tarlangin, Serchhip District chhungah Police post awmzat hi 145 niin thawktu 103 an awm bakah Post hnawhkhah loh 42 a awm mek a, Serchhip, Thenzawl leh North Vanlaiphai-ah Police Station awmin Chhingchhip-ah Out-Post a awm a ni. Kum 2021 chhungin District chhungah thubuai 111 ziahluh a ni a, thil tisualtu mi 121 man niin Case 111 zinga Case 93 te hi Chargesheet tawh, Court a thawn vek tawh an ni. Case 9 te chu finfiahna tha tawk awm loh avangin Final Report siama tihtawp an ni thung a, Case la chhui zui lai 9 a awm bawk.

Kum 2021 chhung khan Serchhip District-ah thih dan pangngai lova thi (unnatural death) case 11 ziahluh a ni a, an zinga a tam ber hi inawkhlum niin, tui-a tlahlum leh tukverh atanga tlate pawh an awm a. Dan lova Kuhva phurh bag 1340 man niin a phurhna lirthei 13 man a ni a, dan angin Custom Department lamah hlan an ni. Silai chi hrang hrang 10 leh a mu 27,465 zet man a ni a, a neitu nia puhte pawh dan angin Court-ah thawn an ni.

Kum 2021 chhung vek khan tualchhung siam Zu litre 2737 leh Sap Su/Beer um 8 man a ni a, Zu man zawng zawng hlut zawng hi Rs. 3,25,450/- vela chhut a ni. Ruihhlo kaihhnawih (ND&PS Act) dan bawhchhiatna case 9 ziahluh niin damdawi man hlut zawng hi Rs. 3,29,500 a ni a, damdawi kaihhnawihah hian mi 14 man an ni.

Nikum chhung vek hian naupang kumtling lo mipat hmeichhiatna hmanpui leh a kaihhnawih ah POCSO Act hmangin thubuai 7 ziahluh a ni a, Serchhip District-ah hetiang lam hawi case a tam bik nia sawi a ni.

Kum 2021 chhung vek khan COVID-19 laka himna dan bawhchhia mi 585 zet Police ten manin an sum chawitir pawh Rs. 76,000/- a ni a, Motor Vehicle Act dan bawhchhia mi 351 manin an pawisa chawi tlingkhawm chu Rs. 1,38,790/- a ni bawk.

Kum 2021 chhunga case harsa tak 5 lai chhuichhuaktu ASI Michael Lalremsanga chu Police Hqrs. in Good Service Mark a pe a,  ASI R. Vanlalfinga leh ASI Vanlallawma te pawhin case harsa pakhat darkar 24 chhunga an chhuichhuah avangin DGP Cash Reward an dawng a. Police paruk ten an thawh that avangin Commendation an hmuh bakah Appreciation hi vawi 165 zet hnathawktuten an dawng hman bawk a ni.

Nimin a he hun hmanna ah hian sawm bik te atangin Serchhip DIPRO K. Saitluanga leh Serchhip-a Police Pension tawh bakah a thawklai te pawhin thu an sawi bawk a ni.

Comments

Popular News (Last 30 Days)