NABARD sum hmanga hnathawh sawifiah an phut

Mizoram Pradesh Congress Committee (MPCC) Vigilance Cell chuan MNF sawrkarin School 172 sak thatna tura NABARD sum cheng nuai 3,500 an puk hmanga dik lo taka hnathawhte sawifiah tur leh hnathawh dik lo zawng zawngte a rang thei ang bera siamthat tir leh turin Education Minister Lalchhandama Ralte an phut tih an sawi.

Niminpiah a Aizawl Press Club-a thuthar thehdarhtute an kawmna ah MPCC Vigilance Cell Chairman C. Ngunlianchunga chuan January 22, 2022 khan Team thum ah inthenin, Tuivawl (Education Minister Lalchhandama bial) chhunga MNF sawrkarin NABARD sum cheng nuai 3,500 an puk hmanga an hnathawhna School 15 tlawhin, thil dik lo tam tak an hmuh thu a sawi a. School 15 an tlawhte hi a nih dan tur ang taka sak leh khawih pakhatmah a awm lo nia sawiin, “School tina hnathawktute hian Approved Estimated amount aia nuai tam taka tlem vekin hna an thawk a. Estimated amount Rs. nuai 72.92 ho hi Rs. nuai 55 te, nuai 57 tein an thawk a, nuai 29.18 man pawh nuai 21 te, nuai 20-ten an thawk. Nuai 18.03 man hi nuai 12-in an thawk bawk,” a ti a ni.

MPCC Vigilance Cell Chairman chuan School Repairing Work cheng nuai 8 leh nuai 10 manah takngial pawh Estimate angin an thawk pha lo nia sawiin, senso ah hian a tlangpuiin Rs 1,00,000 bak an sen a rinawm loh thu leh School thenkhatah phei chuan Rs 1,00,000 aia tlem hial pawh hman a nih a rinawm thu a sawi a. Approved Estimated Amount aia tlem zawk veka hna thawhtir an ni hi a thawktute ngei pawhin an hrethiam lo hle niin a sawi bawk.

Hei bakah hian hnathawh tam tak dik lo awm chung pawha Completion Certificate chu hotu sang lamin an pechhuak thei chu man tang eitu an awm tih a chian thu Ngunlianchunga chuan sawiin, “Heng hnathawhna tura dah pawisa nuai tam tak hi khawiah nge a awm tih hriat a ni lo a. A taka thawk miah lo thil tithei tak hnenah pawisa kawngbo thahnem tak a lut ngei niin a lang a. Hei hi sawifiah ngei turin Education Minister kan phut a ni,” a ti.

MPCC Vigilance Cell Chairman chuan, “Central Scheme atanga Education Department-in School sakna tur a hmuha a hmangtuten an duh a nih am an hmang tha lo deuh a nih pawhin thu dang a ni. Mahse, Mizoram sawrkarin NABARD atangin loan-a School sakna tur a puk a ni. Hei hi Mizoram mipui leibaa lut tur a ni a, a pung nena rulh leh tur a ni,” a ti a. “Kan sum leh pai dinhmun kan hre vek a, sawrkar hnathawk ten a hun takah hlawh an la thei lo a. Mizoram sawrkarin sum leh pai chungchang ah nasa taka harsatna a tawh mek laia Party Worker-te insiam nan leh induhsak nan maia an hmang hi hriatthiam harsa kan ti a ni,” a ti bawk.