Mizoram in a thlawna a dawn Mobile I-Lab chu hun reilote ah hman theih beisei a ni

Health Minister Dr. R. Lalthangliana chuan Mobile I-Lab (Infectious Disease Diagnostic Laboratory) chu a nihna ang taka hmang tan turin khawl mamawh a la kim lo deuh tih sawiin, heng te hi lei turin hma an lak mek thu leh reiloteah a nihna tur ang takin kan hman theih a rinawm tih a sawi.

Sawrkar Laipui-a Ministry of Science & Technology in Mizoram tana a thlawna an pek Mobile I-Lab (Infectious Disease Diagnostic Laboratory) hi Inrinni khan Lengpui-a a awm lailawkna ah Health Minister Dr. R. Lalthangliana chuan tlawhin he thu hi a sawi a, Mobile I-Lab, RT-PCR Sample Test theihna khawl hi January ni 20, 2022 khan Chief Minister Zoramthanga leh Union Minister For Science & Technology Jitendra Singh ten a ruala an hawn tawh thu sawiin, “Hmarchhak State zinga a dawng hmasa ber leh a dawng awmchhun kan ni,” a ti.

Manipur-ah Mobile I-Lab hi a awm ve thu sawiin Health Minister chuan, chu erawh chu sawrkar ta ni lovin, Private company te ta man nei a an hman hawh a nih thu leh a thlawn liau liau a an dawn a nih thu a sawi a, “Nikum November thla a neih hman kan inbeisei laiin sawrkar laipuiin Govt. e-Marketplace (GeM) hmanga engkim lei tawh tur a tih avangin min leisaktu Institute of Bioresources and Sustainable Development (IBSD) Imphal, Manipur ten a man pek kawngah harsatna an tawk deuh a, tawngka leh lehkha te pawhin kan umzui reng a, an hun tiamah min rawn pe thei lova, January thla chawhnu lamah kan dawng hman tawk a ni,” a ti. A nihna ang taka hmang tan turin Mobile I-Lab rawn thlengah hian khawl mamawh a la kim lo deuh a, hengte hi lei turin hma kan la mek a, reilote ah a nihna tur ang takin kan hmang thei tawhin a rinawm a ni, a ti bawk.

Dr. R. Lalthangliana chuan ZMC-ah RT-PCR khawl pariat kan nei tih sawiin, “Lunglei-ah pakhat kan nei tawh bawk a, Champhai-ah dah turin kan inruahman mek a, RT-PCR khawl pawh Champhai-ah a awm tawh a, khawlin a ken tel bungraw hrang hrangte pawh kan lakhawm mek a, khawl bunna tur sak hna pawh kan thawk tan tawh a ni,” a ti bawk.

Mobile I-Lab hi cheng nuai 105 man a ni a, sample test hna thawk tur Laboratory Technician te hi tunkar hian ZMC-ah training pek an ni dawn a, lirthei registration buaipui mek niin, National Accreditation Board for Testing and Calibration Laboratories (NABL) hnenah hman phalna license dil mek a ni bawk.

Health Department hotute chuan Mobile I-Lab chu a len bakah a sang deuh a, thingtlang hmun kilkhawr ber berah te kal theihlohna a nei a nih chuan a kal theih chin tawp berah inhungin mipuite pan theih turin an inchhawp hnai thin dawn tih an sawi a, Mobile I-lab siamtu AMTZ (Andhra Pradesh MedTech Zone Ltd., Vishakapatnam) chuan nikhatah sample 50 vel test theih a nih tur thu an lo sawi tawh bawk a ni.

Comments

Popular posts from this blog

Volleyball S/F khel dawn