Chanchin thar lawrkhawm :

Hnahthial Bawrhsap in tlawh

Hnahthial District Bawrhsap R. Lalrem-sanga chuan Inrinni khan an District chhunga Aithur leh Khawhri khua te tlawhin VC leh tlawmngai pawl hruaitute nen inkawmna an nei a, Aithur-ah hian an khuaa kum 18 chunglam za-ah za (100%) ten Covid-19 Vaccine an la leh kum 15 -18 inkar ten first dose an lak vek bakah tun thlenga Covid-19 hri kai an la awm lo chu lawmawm a tih thu a sawi a, Ramngaw leh Nung-cha humhalhna kawnga an hmalakna pawh fakawm a tih thu sawiin, theihtawp chhuah zel turin a chah bawk. Khawhri-ah hian Hnahthial Bawrhsap chuan Myanmar atanga raltlan rawn lut te tlawhin a tul ang zelin an mamawh phuhruk tum a nih thu a hrilh a, Mutbu (Blanket) thahnem tak leh damdawi te a pe nghal bawk.

Hmunphiah Mahal duh lo

Sêrlui Joint Farmer-te chuan thuchhuah siamin, an Hmunphiah tharchhuah man man zâwka hralh an tum laia, sawrkarin a mahal sak â, Kg. 1-ah Royalty Rs. 7 zêl lâksak a tum chu thalo an tih thu leh Royalty hi Kg. 1-ah Re. 1 lak thin a nih laia Rs. 7-a a pung mai chu hriatthiam harsa an tih thu an tarlang a. An hmunphiah thar te hi Kg.1-ah Rs. 30 âia sânga hralh theih loh tura tih chu an duhlo takzet tih sawiin, “Kan thlai tharte hi a lei to ngam bertu hnenah zalen taka kan hralh theih nan sawrkarin ruahmanna siam thuai turin kan phut tlat a ni,” an ti bawk. Hetihlai hian Kolasib DFO chuan tun thla ni 18 khan mimal in Forest ramchhung ami ni lo Hmunphiah an hralh dawn chuan Administrative Charge hi Hmunphiah hring ah kg. khat zelah Rs. 1/- lak tur a nih thu thuchhuah siamin a lo tarlang tawh a, tuna Royalty Rs. 7/- lak tur anga sawi chu a nih loh thu a sawi a ni.

Raltlan te awmna tur cheitha

YLA South Lungpher Branch te chuan an khuaa Myanmar raltlan te awmna atan an khuaa Tourist Lodge sak mek chu Inrinni khan an chei tha a, South Lungpher-ah hian raltlan mi 100 chuang awm tawhin la thlen belh tur an awm bawk.

Lunglei South MLA in raltlante Camp a tlawh

Lunglei South bialtu MLA leh Bamboo Development Board Vice Chairman Dr. K.Pachhunga chuan Inrinni khan a bial chhunga Myanmar raltlan te Camp, Thaizawl chu a tlawh. Raltlan Camp a tlawhna ah hian Dr. K. Pachhunga chuan India sawrkar angin raltlante ngaihtuah remchang rihlo mahse Mizoram Sawrkar chuan a ngaihthah ngawt theilo tih sawiin, India sawrkar ah tanpuina leh chhawmdawlna dil thin mahila kan hmu theilo a, Sawrkarin remchang ang ang a ngaihtuahna thu leh pawl hrang hrangin tanpuina leh chhawmdawlna an pek thin thu te a sawi a ni. Tun dinhmunah Thaizawl-a raltlan Camp-ah hian raltlan mi 560 an awm mek a ni.

Lawngtlai District-ah raltlan 5200 awm mek

Myanmar buai vanga sahimna zawnga Myanmar mi, Lawngtlai District a raltlan mi 5200 an awm mek nia chhinchhiah a ni a, Raltlante hi Sangau RD Block huamchhung Eastern Zone-ah 2606, Paithar Zone- ah 641, Lawngtlai khawpui chhung, Town Zone-ah 1585 awmin, District khawthlanglam, Western Zone-ah mi 368 an awm mek a ni.