Latest News

Mizoram kawlphetha dinhmun chungchang Governor in P&E Deptt. hotute a sawipui

Mizoram Governor Hari Babu Kambhampati chuan Power & Electricity (P&E) hotulu te chu nimin khan Raj Bhavan-ah kawmin Mizoram mamawh Kawlpetha chungchanga kan State dinhmun leh sawrkar hmalakna te a sawipui.

He hunah hian P&E Commissioner & Secretary H. Lalengmawia chuan P&E hnathawh tlangpui, Power mamawh dan leh intodelhna kawnga hmalakna kalpui mek chungchang te a sawi bakah Laltlanthangi, Sr EE, Works-I chuan Nizung chakna ringa Kawlpetha siamchhuah chungchanga an hmalakna te a sawi a, H. Lalnunsanga, EE, Commercial chuan Kawlpetha chungchanga Mizoram dinhmun a tarlang bawk.

P&E Department hotute thusawi atangin Mizoram mipui tam zawkin Grid Connected Solar Rooftop hmanga Electric Current pawh hlawk zia leh a that zawk zia te, a tirah sum sen so tam zawk mahse a hnuah nasa takin Electric Current thla bi bill a tlem phah zawk a ni tih te an la hre chiang lo in a lang tih Governor Hari Babu Kambhampati chuan a sawi a. Mipui mamawh bik department thenkhat ang bawkin Power Department pawhin mipui zirtirna uar zawka a kalpui a ngai a. Tuna a landan chuan Department tam takin Central anga hamthatna tam tak awm mek hi beneficiary te an thlen thin loa, hei hi tanlak ngaihna lai a ni a. Mipui zirtirna kawngah theihtawp chhuah a la ngai hle tih a sawi a ni. Mizoram in Kawlpetha a mamawh zat 171 MW ang hi chu tuiluang chakna hmang leh nizung chakna hmangin harsa lo takin Mizoram chhungah a siam theih tih a chiang tih Governor chuan sawiin, kan hma lawkah Solar Power Plant engemaw zat leh Small Hydel Project te hman theih tura hawn a ni tur chu a lawmawmin Mizoram hmabak a eng hle a ni, a ti bawk.

19th Electric Power Survey of India chhut dan chuan sawrkar kum 2021-2022 chhunga Mizoram in power a mamawh zat chu 171 MW niin Central Sector leh ISGS atanga Mizoram chanpual chu 213.14 MW a ni a, hemi hun chhunga Mizoram in kawlpetha a mamawh zat chu a Unit zawngin 866 MU (Million Units) a ni. Mizoram mamawh Kawlpetha 90% te hi central Sector atanga pawhluh a ni a. Hei hi Hruipui 132kV S/C Jiribam - Aizawl (PG), 132kV S/C Badarpur - Kolasib S/S - Aizawl (PG), 132kV S/C Kumarghat – Aizawl (PG) leh 400kV D/C Silchar - Melriat (PG) , Sakawrtuichhun charged at 132kV atangin a lakluh a ni.

Tunah hian State in Electric siamchhuahna Station – Small Hdel Project 11 a nei a; heng atang hian 29.35 MW siamchhuah theih anga chhut a ni nain siamchhuah tam a nih lai berin 16 MW bawr vel bak a thleng thei lova; Thal lai phei chuan 6 - 8 MW bawr vel chiah a pechhuak thei thin a ni.Hetihlai hian Solar Plant 5 a awm mek a; heng atang hian Nieng lan that hunlaiin a tam berah 5.50 MW siam theih beisei a ni. SHP 4, 8.70 MW siamchhuah theihna tur chu hman theih thuai beisei a ni a, Vankal Solalr Park 20MW leh Keifang Solar Plant 10 MW pawh Power Purchase Agreement(PPA) ziahfel tawh ang chuan kumin chhungin hman theih beisei a ni.

Comments

Popular News (Last 30 Days)