Aizawl khawpui kawngpui tawt tih ziaawmna tura ruahmanna siam tur ten CM an kawm

Aizawl khawpui chhung kawngpui tawt tih ziaawmna tura ruahmanna siam tura thawktu tur Mott MacDonald Consultancy Firm Pvt. Ltd., aiawhte chuan nimin khan Chief Minister Zoramthanga chu a Pisa-ah an kawm.

He inkawmna ah hian UD&PA Secretary K. Lalthawmmawia leh UD&PA Director H. Lianzela te pawh telin Chief Minister chuan Aizawl khawpui chhunga kawngpui tawt tawh lutuk avanga lirthei chet vel harsatna leh Traffic Jam nasa lutuk tihreh chu sawrkarin a ngaih pawimawh berte zinga mi a nih thu Mott MacDonald Pvt. Ltd. aiawhte hi a lo hrilh a, Sawrkar anga hma an lo lak tawh thinna te leh ruahmanna an lo siam te a hrilhfiah bawk a, Aizawl khawpui leh a chhehvelte uluk leh chipchiar taka zirchiang a, mipuite tana harsatna awm lo tur thei ang bera ruahmanna tha tak siam chhuak ngei turin duhsakna a hlan a ni.

October ni 26, 2021 khan Department of Economic Affairs, Ministry of Finance, Govt. of India leh Asian Development Bank (ADB) te chuan ADB loan US $ 4.5 million hu Project Readiness Financing (PRF) Loan atan inremna an ziak a, he loan hi Aizawl Sustainable Urban Transport Project (ASUTP) tana ruahman niin, Aizawl khawpui chhunga kawngpui tawt lutuk vanga lirthei chetvel harsatna sutkianna tur project a ni. He loan hi Aizawl khawpuia kawngpui tawt chhawk zangkhaina tura ruahmanna hrang hrang siamna atan hman tur niin hnathawk turin Consultancy Firm hmingtha, Mott MacDonald Pvt. Ltd. chu thlan a ni.

Loan Agreement angin Mott MacDonald Pvt. Ltd. hian January, 2022 atanga chhiara kum 3 (thla 36) chhung, December, 2024 thleng hun an nei a, hemi chhung hian zirchhianna hrang hrang an kalpui dawn bakah Comprehensive Mobility Plan (CMP) for Aizawl Urban Area leh Detailed Project Reports (DPR) an peihfel tur a ni a. Sawrkar laipui chuan loan US $ 4.5 million atanga 90% chu Mizoram sawrkar hnenah grant angin a pe dawn a, a bak 10% hi loan angin a pe chhawng dawn bawk a ni. An DPR siam hi Mizoram sawrkar kaltlangin sawrkar laipuiin a lo endik leh ang a, a tih hlawhtlinna tur sum a ngaihtuah sak leh dawn a ni.