Naktuk-ah Mock Drill nei dawn

Naktuk (January 15, 2026) khian Serchhip khawpui chhung hmun hrang hrangah chhiatrupna lo thlen thulha chhanchhuah leh chhawmdawlna hna thawh dan a tak anga tihchhinna neih a ni dawn a, hemi chungchang ah hian nimin khan Bawrhsap hovin thutkhawm neih a ni.
He Mock Drill hi chhun leh zan-ah neih tura ruahman niin a hmasa zawk hi chawhma dar 10:00-ah tanin hmun hnih - Serchhip Bazar leh Govt. Higher Secondary School-ah te lirnghing avanga building chim, kangmei chhuak, Electric leh inbiakpawhna line chhiate a thleng anga. Chawhnu dar 1:00-ah hnuah thlirletna hun (debriefing) chu DC Office-ah neih zui a ni ang.

A vawi hnihna hi tlai dar 4:40-ah tan a ni anga, P&E Veng-ah In chim-a chhanchhuah leh chhawmdawlna hna thawh dan entirna neih tur niin hei vang hian P&E Veng leh a chhehvel hmun thenkhatah P&E Department chuan minute 5 atanga minute 10 bawr vel Electric power an titawp (cut) dawn a ni.

Nimin-a thutkhawm ah hian Bawrhsap Paul L. Khuma chuan lirnghing a lo thlen thulha chhiatna thleng kan hmachhawn dan tur inzirna Earthquake Mock Exercise hi Mizoram pumah neih a ni dawn tih sawiin, Serchhip-ah pawh hei hi hman tur a nih dawn avangin he nunchan zirnaa mawhphurtute zawng zawngin theihtawp chhuah turin a ngen a. Lirnghing a lo thlena chhiatna chi hrang hrang thleng thei te zir a nih dawn avangin a mawhphurtute mai bakah mipui mimir tan pawha tangkai a nih ngei a beisei thu a sawi a ni.

He thutkhawmah hian District Administration hotute, Department hrang hrang hotute, Assam Rifle, BSF, YMA, MUP, Mock Exercise neihna tur hmun VCP te leh Bazar-a sumdawng aiawhte an tel a. Mawhphurhna hrang hrang insiamrem leh inruat niin hmalak dan tur leh tihtur te inhrilhhriat a ni a. January 14, 2026 (Nilaini) hian chhiatna thlenna tur hmuna chetla tur leh nunchan zir turte chu chiang leh zuala an tihtur te inzirtirna hun an hmang dawn bawk a ni.