Serchhip atanga thlai thawnchhuahna man a to lo; Aizawl-ah chawhmeh thawn belh leh a ni

Serchhip-a Horticulture Department hotute chuan tunhnaia Aizawl lama Chawhmeh chi hrang hrang an thawnthlak te chu sawrkar in ruahmanna a siam ang leh Local Level Task Force kaltlanga pekchhuah leh a nih avangin man to taka hralh a awmloh thu an sawi a. Nizan hmasa khan Chawhmeh thahnem tak chu Aizawl-ah hian thawn thlak leh a ni bawk.

Serchhip Zawlpui phai atanga chawhmeh chi hrang hrang tharchhuah Aizawl lama thawnthlak te man to taka hralh a awm ni thei awma ngaih tura thuthang awm chungchangah kan Palai chuan Serchhip DHO Office-a hemi buaipuitute hi berawn nghalin chawhmeh thawnthlak leh hralhchhuah a nih dan hi a zawtfiah a, Serchhip DHO Office-a thawk te chuan tun tuma harsatna thleng denchhena chawhmeh an thawntlak te hi sawrkar ruahmanna hnuaia Horticulture Department leh Serchhip Agri & Horti Cooperative Society te tangkawp hmalakna anga kalpui a nih thu an sawi a. Heng thlai thawnthlak te hi a man tur bithliah sa vekin Serchhip atang hian Aizawl-ah thawnthlak niin, an Department hotute leh sawrkar in hemi buaipui tura alo ruat ten lo dawngsawngin, mimal sumdawng hnena pekchhuah a awmloh thu an sawi a ni.

Serchhip-a DHO Office-a thawkte chuan heng chawhmeh an thawnthlak te hi Vegetable Supply Chain Nodal Department, Horticulture Department chuan buaipuiin MIZOFED leh Commerce & Industries Department ten Local Level Task Force te hnenah an hlan chhawng leh tih an sawi a, Local Level Task Force te hian an remchan dan angin mipuite hnenah an pekchhuah ve thu leh a man pangngai aia sang taka hralh a remchan loh dan an sawi a. Chawhmeh an thawnthlak chu a man a pangngai reng theilo tih an sawi a. Mimal thahnem ngai ten anmahni Veng bil tana Chawhmeh an rawn lak ve pawh tunah chuan rem an tih tawhloh thu an sawi bawk.

Hetihlai hian Mizoram sawrkar in a rua-hman, Vegetable Supply Chain hnuaiah a tum 2-na atan Serchhip Zawlpui leh a chhehvel zau hrang hrang atanga tharchhuah thlai chi hrang hrang quntal 500 chuang chu nizan hmasa khan Serchhip atangin Aizawl-ah phurhthlak leh a ni a, tun tumah hian Zikhlum quintal 254.34, Bawk-bawn quintal 250.58, Tomato quintal 11.54, Vaimim Kawm 1001, Dhania tel 55, leh Anthur tel 12 te lakkhawm leh a ni. Heng thlai thar  te hi 207 Pick-up Truck 22 leh 407 Truck pathum hmanga phurhkhawm niin  Serchhip Bazarah buk fela challan te siam a nih hnuah Aizawl lamah phurh thlak  leh a ni ta a ni.

Heng chawhmeh buaipuitute chuan kar kalta a chawhmeh an thawn khan Zikhlum hi Kg. ah Rs. 25/- leh Tomato hi Kg. ah Rs. 60/- sawrkar in a lei thu leh tun tumah hian Zikhlum chu a hma aiin Kg. ah Rs. 5/- zela sangin Tomato erawh Kg. ah Rs. 10/- vela tlawm zawk thei tura beisei a nih thu an sawi bawk.

Serchhip Zawlpui leh a chhehvel zau ah hian Thlasik thlai hi chhungkaw 120 velin an ching thin a, kum khata an tharchhuah hi cheng nuai 400 man chuang te niin Zawlpui leh a chhehvel a thlai chingtute chuan Mizoram Chief Minister-in ruahmanna tha tak a siam hi lawmawm an tih thu an sawi bawk.

Thlai chingtu ten rate to an hre lo :

Serchhip Zawlpui Phai-a Thlasik thlai chingtu pawl, Serchhip Agri & Horti Cooperative Society hruaitute chuan Vegetable Supply Chain hnuaia an thlai an hralh te nasa taka a man tihsan a nih an hriatloh thu an sawi a. He hmalakna ah hian Horticulture Department nen indawrna mumal tak neia rate an siam thu sawiin, heng an thlaithar te hi Aizawl-ah Local Level Task Force kaltlanga hralhchhuah leh a nih avangin an hralh leh-chhawnna rate hi an hriatpui ve tawhloh thu leh Local Level Task Force te kalpui dan pawh an hriatpui loh thu an sawi bawk.