NUNGCHA HUMHALH

NUNGCHA HUMHALH

- Lalrinmawia Pachuau

Pu Rokunga’n ‘Chhawrpial run’ a a lo chhal, Pu Vankhama’n ‘Rimawi Ram’ ti a chhuang em em a a lo auh lawm lawm, he Zoram hian a nihna a hloh ta em ni? Nge Chawngtinleri a nuar zawk le..? Vanapa ten Sai ramchhuah an neih hunlai te kha chuan, ban phak lek lekah sakhi leh sazuk ki hreu \ha pui pui te kha an ther fur kha a ni a, an tleirawl hruai pakhat insum thei lo chuan Sakhi an kap thawr mai a, Vanapa khan a kamkhat hial nghe nghe a nih kha. Kha ram kha tuna kan Zoram hi a ni. Awih a har mange aw!

Ramchang kum engemawzat vahdar loh, chhun pachangah pawh thim ruih mai hnuaiah khan zotui thiang a luang kawi ngiai ngiai a, Sava chitin reng ten an tlan hut hut a, thing par chitin awiin Rengchal leh Ngirtling an hram a, Senhri par leh Chhawkhlei par ten Zoram hi an mawi takzet \hin a nih kha. Hei hi a ni Rimawi ram, Zoram tunhma awm dan chu!

Khawvel hun inher zelah changkan lam kan pan a, khuarel, leilungin a thlawna min chhawpchhuah sak thing leh mau leh nungchate hlutna chu siamchawp khawl thil leh hmanraw changkang zawkte ngaihlutna in a luahlan zo ta. Kan hnena awm a, cheng ve tur leh kan mamawh, khuarel thil zawk chu kan suasam a, nungchate khawvel kan tichereu mek zel a nih hi. Ram hring nuam leh nungcha tinreng tuallenna chu thlaler ramah kan siam lo chauh chu a ni e. Khawmual a cheng duhtawk mai lovin luia nungcha tinreng thlengin Tur nen kan hrai duh a, Zofate hi nungchate hian min \ih ngawih ngawih tawh ni hian a lang asin.

Tunah erawh chuan heng nungchate leh ramngawte hlutna kan hre letling leh \an mek hi a lawmawm hle. Khaw hrang hrang ten an huamchhung luidung an humhalh thar leh ta te, ramvak miten an silai an han tung te hian nungchate tan beiseina thar a siamsak ngei ang le.

|hangtharte an fing zel a, kan chhehvela nungchate leh ramngaw te nena kan in mamawh tawn zia kan hre chho deuh deuh zel a, chutihrualin Sawrkar lam pawhin thingtlang lo neih bansan a, huan leh ram nghet nei a eizawnna tur ruahmanna an siam chho zel te hian beiseina sang tak min siam leh \hin a ni.

Khawvel hi chenna tlak a nih zel theih nan te, kan tu leh faten boruak nuam leh thiang an rawn chen theihna tur atan te leh khawvel \ha zawk kan din theih nan nungchate leh ramngawte kan humhalh a \ul hle a ni. Kan rama sava mawi tak tak te leh ramsa duhawm tak tak te venghim a, a la awm ang ang enkawl a, humhalh hi kan tih tur a ni. Kan luidunga Sangha mawi tak tak te hi thlalakna changkang tak tak te nen hian i veh tawh zawk ang u hmiang. Tichuan kan ram hi rimawi ram a lo ni leh ang.