Mathematics Teachers Training neih tan a ni

Zoram Entu Pawl (ZEP) hnuaia Quality Education leh Serchhip DIET buatsaih, Serchhip District chhunga Primary School leh Middle School-a Mathematics Teachers tana mi 4 awh tur 'Mathematics Teachers Training' chu nimin khan Serchhip-ah neih tan a ni.

Serchhip DIET Multipurpose Hall-a he Training hawnna hi Serchhip DIET Principal, Lalrammawia chuan hmanpuiin Zoram Entu Pawl ten thahnem ngai taka hetiang training an buatsaih thin chu lawmawm a tih thu a sawi a, ZEP leh DIET tangkawp in vawi tam tak training an buatsaih tawh thu sawiin, School thenkhat ten an ngaih pawimawh laiin ngai pawimawh loh thenkhat an awm nia a lan thu leh training a tel te chu software ah mumal taka chhinchhiah vek an nih thu a sawi a. Hei vang hian zirna In hrang hrangte pawhin training hi ngai pawimawh thin se a duh thu leh training a tel te pawhin an hlawkpui ngei a beisei thu a sawi bawk.

He Training kaihruaitu ZEP Quality Education-a Coordinator, Baby Lalthakimi Chinzah chuan he Training hi TATA Trusts leh Trent Ltd. te bultuma neih a nih thu sawiin, ni 4 chhung training neih chhung hian Primary School zirtirtu leh Middle School Zirtirtu tan ni 2 ve ve hun hman a nih dawn thu a sawi. He Training-ah hian Resource Person atan Navnirmiti Learning Foundation, Pune atangin Geeta Mahasabde leh Swati More te hman an ni a, anni hian zirtirtu kalkhawmte chu naupang ten awlsam leh nuam ti taka Mathematics an zir theih nana zirtir dan turte an zirtir dawn a, nimin a he Training ah hian zirtirtu mi 50 vel an tel a ni.