Lenkawl

Hnam thuam a dahlau lo zawngin kalpui ni rawh se - C.Ramengmawia

Serchhip District chhunga khawchhak lam, Chekawn leh Artahkawn inkar kawng chhe lutuk siamthat hna chu tunlai hian ngawrh taka thawh mek a ni a. He kawng siamthat hna hi chak zawka thawh anih theih nan leh hnathawktu ten buaina an tawh loh nan Serchhip SP chuan he kawng-a lirthei tlan theih hun tur leh kawng danpin hun tur thuchhuah siamin a tarlang a. Hemi ang hian zing lamah dar 8:00 atanga chawhnu dar 1:00 thleng hi dangin chawhnu dar 1:00 leh dar 2:00 inkarah kawng hawn a ni anga. Tlai lamah dar 2:00 atanga dar 5:00 thleng kawng hi dan leh a ni ang. Kawng dan chhunga kawng helna-a lirthei tlan dan tur pawh ruahman nghal a ni a, LMV leh a hnuailam tan Varhva lui kaltlangin Bunghuai atangin Chekawn-ah kal theih a ni anga, HMV tan Chekawn atangin North Vanlai-phai lamah kaltlang theih a ni bawk ang. He thupek hi tun thla ni 27 atanga hman tura tih kha niin hnathawh zawh a nih hma chuan hman tur a ni anga, thupek hian Emergency leh Law & Order duty te a huam lo ang.

P&E Department Serchhip Power Division buatsaihin nimin khan Serchhip DC Conference Hall-ah 'Electrical Safety Day' hmangin kawlphetha avanga vanduaina hrang hrang thleng palh thei laka fimkhur dan tur kawng hrang hrang inzirtirna neih a ni.

Mizoram Larsap in Discretionary Fund a pekchhuah hmangin nimin khan Serchhip-a mi-dangte tana rawngbawlna hna thawhna hmun pathum-ah tanpuina Rs. 25,000/- theuh hlan a ni.

Serchhip District Bawrhsap Nazuk Kumar IAS chuan nimin khan Serchhip District chhunga National Highway laihzauh leh siamthat hna thawk mektu Company pathum(3)-a hotute chu a Pisa-ah kawmin Fur ruahtui tlak hma ngeia kawng chhe zual siamtha tur leh leimin hlauh-awm kawngchhak lam te thianfai turin a hriattir.

India ram zalenna kum 75 na lawmna, Azadi Ka Amrit Mahotsav (AKAM) hnuaia hmalakna pakhat, Child Care Institution (naupangte en-kawlna) hmun te tana ni 3 awm infiamna lama inelna neih chu nimin khan Serchhip District-ah zawhfel a ni a, he inelna hi Serchhip-ah chuan Unity Orphanage Home ten a hranga neiin Zoar Deprived Children Home leh Observation Home ten a inkawpin an nei a, kum bithliah siamin kawng hrang hrangah inelna neiin lawmman tha tak siam a ni a, a kharna hunah hian infiamna lama mi hmingtha ten an telpui bawk a ni.

Thla thar May 9-a Chakma Autonomous District Council (CADC)-a MDC thlanna neih turah Candidate 73 an awm dawn ta a, inthlan chuh tumte tana inhnuhdawhna hun hawn laiin Independent-a he inthlan chuh tumtu chu a in-hnuhdawh avangin Candidate hi 73 an awm dawn ta a ni. Seat 20 awmna CADC-ah hian Bharatiya Janata Party (BJP), Indian National Congress (INC) leh Mizo National Front (MNF) te chuan bial awm zawng zawng an chuh vek dawn a. Zoram People's Movement (ZPM)-in bial 13 an chuh ve bawk a ni.

Shri Ratan Lal Foundation, Delhi chuan Corporate Social Responsibility (CSR) atangin puanthui khawl 34 chu Mizoram Police Wives’ Welfare Association (MPWWA) tan pein nimin khan heng khawl te inhlanna hi GS Arya Mess, PHQ-ah neih a ni a, Mizoram DGP Devesh Chandra Srivastva IPS chuan heng puanthui khawlte hi MPWWA Unit hrang hrang hnenah a hlan a ni. Heng puanthui khawlte hi hmeichhia te tan puanthui leh kut themthiamna lam zirtirna atana hman tura ruahman niin hemi hmalam hian khawl dang 24 an lo pe tawh bawk a ni.

Health Minister Dr. R. Lalthangliana chuan NABARD (RIDF-XXVI) 2020-2021 atanga sum hmuh cheng nuai 268.99 senga sak, Bungzung Primary Health Centre Building thar chu nimin  zing khan a hawng a, nimin tlai khan NABARD (RIDF-XXV) atanga sum hmuh cheng nuai 246.94 senga sak, Farkawn PHC Building thar chu a hawng nghal bawk. Bungzung PHC Building thar hi Zopa chhiara chhawng hnih niin Ground Floor-ah Room hrang hrang 19 awmin First Floor-ah Main Centre leh Conference Hall-te a awm bawk. Farkawn PHC Building thar hi Zopa chhiara chhawng khat niin Room hrang hrang 18 a awm bawk a ni.

Mizoram Upa Pawl (MUP) General Assembly Vawi 48-na chu nimin khan Social Welfare Minister, Er. Lalrinawma chuan Aizawl Vanapa Hall-ah a hmanpui.

PHE Department changtu Deputy Chief Minister Tawnluia chuan nimin khan cheng nuai 551 senga siam nizung chakna hmanga Tlangpui/Tlangmawi khua te tana tui lakna chu a hawng.

Power & Electricity enkawltu Minister R. Lalzirliana chuan nimin khan ‘Electrical Safety Day’ chu Bawngkawn South Cultural Centre-ah a hmanpui.

Mizoram sawrkar-a Taxation Department chuan kum 2022-2023 chhunga Sawrkar-in Chhiah an hmuh tur zat (target) a bituk an khum lawmna hun an Department Auditorium-ah hmangin Chief Minister Zoramthanga chuan a hmanpui a ni.

Serchhip Sub-Hqrs. YMA Inkhawmpui vawi 7-na Chhingchhip Venghlun Branch a neih chu nizan khan a tiak ta a, nimin khan khawmpui Rorel Inkhawm leh kum 2023-2025 chhunga hruaitu tur thlanna neih niin President nilai Kawlthuama chu President atan thlan nawn leh a ni.

Nimin khan Serchhip DC Conference Hall-ah Serchhip District tan Tribal Artisan Mela (TAM) neih a ni a, District Bawrhsap Nazuk Kumar IAS chuan a hmanpui a ni.

Serchhip-a District Civil Supplies Officer (DCSO) Lalthanmawia chu Aizawl West-ah DCSO hna chelh tura sawn niin a aiawh tur hian Supply Department a Asst. Director nilai Vanlal-hriata chu dah a ni a, nimin khan Serchhip DCSO chhuak tur hi a thawhpuite chuan thlahna hun hmangin mawhphurhna an inhlan nghal a ni.

World Malaria Day puala Malaria dona tura hmalakna kal mekah nimin khan Serchhip Main Centre hnuaia ASHA thenkhat leh Health Workers te tan Serchhip Main Centre-ah an hmalakna thlirletna leh Malaria dona kawnga hmalak zel dan tur inzirtirna neih a ni a, he hunah hian District Vector Borne Disease Control Programme-a Consultant Lalchhuanawmi Khiangte chuan zirtirna a pe a ni.

All Mizoram Muster Roll Teacher's Association Serchhip District chuan nimin khan CMS Picnic Spot-ah Conference hmangin kum 2023-2024 chhunga hruaitu tur thlanna an nei a. President-ah H. Lalsawmliana (Govt. P/S Hmuntha); Vice President-ah John Lalfakawma (Govt. P/S-I Bungtlang); Secretary-ah Andrew J. Lalherliana (Govt. P/S-IV Bungtlang); Asst. Secretary-ah Lalhlimpuia (Govt. P/S-III Keitum); Treasurer-ah Lalhmangaihzuali (Govt. P/S Neihloh) leh Fin. Secretary-ah Julie Vanneitluangi (Govt. P/S Hriangtlang) te thlan an ni. All Mizoram Muster Roll Teacher's Association Serchhip District hi Dec. 1, 2019 khan din a ni a, Mizoram pumah pawl anga indin hmasa ber niin tunah hian Member 79 an awm mek a. Nimin-a Conference hi Serchhip SDEO R. Vanlalmuka chuan a hmanpui a ni.

Tuikum bialtu MLA Er. Lalrinawma chuan niminpiah khan a bial chhunga Sainik School leh Baktawng-a Public Playground laih mek te chu a tlawh.

Ministry of Electronics & IT, Unique Identification Authority of India chuan India ram pumah Aadhaar nei tawhte tan Document Update Project a kalpui mek a, Aadhaar nei tawh te tan anmahni ngei an ni tih lantirna (Proof of Identity) leh an chenna address (Proof of Address) te upload a ngai a. Aadhar Card nei tawh te chuan Aadhaar Enrolment Centre-ah Rs. 50/- chawiin document te an update tir thei a, mahni a ti duh tan https://myaadhaar.uidai.gov.in/ ah kumin June 14 thlengin update theih bawk a. Sawrkar chuan hei hi ngaihvena Aadhaar document lo update turin mipuite a hriattir a ni.

Mizoram Primary Teacher's Association (MPTA) Sub-Hqrs. Serchhip chuan nimin khan Serchhip Hmar Veng YMA Hall-ah Conference vawi 15-na hmangin hruaitu thlanna an nei a, President-ah Lalnunsanga (Serchhip); Vice President-ah Vanlalvuana (Serchhip); Secretary-ah Zonunsanga (Serchhip); Asst. Secretary-ah K. Laltlanliana (Chhiahtlang); Secretary i/c Information-ah K. Zodingliana (Chhiahtlang); Secretary i/c Statistic-ah R. Lalchhuan-liana (Chhiahtlang); Treasurer-ah C. Lalrinsangi (Serchhip) leh Finance Secretary-ah V. Lalmuanpuii (Serchhip) te thlan an ni.

Commerce & Industries Minister Dr. R. Lalthangliana chuan nimin zing khan Champhai District chhunga Indo-Myanmar ramri depa awm insumdawntawnna kawnga pawimawh Zokhawthar khua tlawhin ramri kaltlanga insumdawntawnna chak zawka kalpui a nih theihna tura hmalakna kalpui mekte a enfiah a. Ramri insum-dawntawnna kawngah mipui eizawnna tibuai lo leh khaihlak lo tura hmalak chu Sawrkar duh dan a nih thu sawiin, danin a phalte hmanga sumdawnna kalpui chu mipuite zawm tur leh mawhphurhna a nih thu a sawi a. International Border Trade tihchangtlun nan cheng nuai 1,500 in Zokhawthar Land Custom Station upgradation kalpui mek a nih thu a sawi bawk. He hunah hian Law & Judicial Minister TJ. Lalnuntluanga pawhin Land Custom Station (LCS) aia changtlung Integrated Check Post (ICP) nei thei tura hmalak kawngah chak lehzuala \anlak zel a pawimawh thu a sawi bawk.

Larsap Dr. Hari Babu Kambhampati chuan nimin khan Raj Bhavan-ah Rural Development Department hotulute kawmin PMAY (Grameen) hmalakna leh hmasawn dan a sawipui a. RD hotute chuan PMAY(G) hmalakna kalpui mek a Data thar ber te tarlangin, In sak zawh tawh zat te, Installment hrang hranga tanpuina dawn tawh chin te chipchiar takin an tarlang a. Larsap chuan Sawrkar kum thenkhata installment thenkhat te dawn kim a nih loh chhan te, Ministry-ah bawhzui a ni em tih leh State sawrkarin a tihtur a ti em tih bakah thil tul dang te zawtin; RD Official te chu Ministry atanga zawhna an siam te chu a zing deuh a nih pawhin tha tak leh rang takin chhang zel turin a chah a. State RD in a tihtur chin te tha taka a ti chung pawhin Ministry lam atanga sanction an ti muangchang a nih chuan Governor Office lam atangin theih-tawp chhuahpui a inhuam tih a sawi bawk.

Mizoram-a GST zirchianna nei a lo zin CEX & Customs, Guwahati Zone-a Chief Commissioner CGST Yogendra Garg chuan niminpiah chawhnu khan Governor Dr. Hari Babu Kambhampati chu a kawm.

Police hnathawh tanpuina ngaituah chhuak tura Computer thiam rual intihsiakna, Hackathon chu nimin khan Police Hqrs. Arya Mess-ah Governor Dr. Hari Babu Kambhampati chuan a hawng.

Mizoram State Sports Council (MSSC) leh Serchhip District Football Association (SDFA) tangdun buatsaih Serchhip District chhunga Football Grassroots Centre 5 tana ni 2 awh MSSC TATA Trusts Football Academy District Level PMJVK Football Tournament chu nimin khan Serchhip Sports Complex-ah khelh zawh a ni ta a. He Tournament-ah hian Serchhip, Chhiahtlang, North Vanlaiphai, Thenzawl leh East Lungdar Centre te telin tum khat theuh an intum kual hnuah Chhiahtlang leh Serchhip Centre ten point 9 ve ve hmuin GD tha zawk Chhiahtlang Centre hi an champion ta a ni.

Serchhip Sub-Hqrs. YMA Inkhawmpui vawi 7-na Chhingchhip Venghlun Khelmual-a neih mek chu nimin khan Tuikum Bialtu MLA leh Minister Er. Lalrinawma chuan khuallian niin a hmanpui a, Pathian in pawl tha leh thianghlim YMA min pe chu lawmawm a tih thu a sawi.

District Vector Borne Disease Control Programme, Serchhip District chuan kumin a ‘World Malaria Day’ pualin Malaria chungchang inzirtirna chi hrang hrang an kalpui mek.

Mizoram sawrkar hnathawktu intelkawmna pawl lian ber Federation of Mizoram Government Employees & Workers (FMGE&W) chuan nimin khan General Conference vawi 32-na hmangin Chief Minister Zoramthanga chuan khuallian niin a hmanpui a ni.

Niminpiah khan Mizoram-a Sample enfiah 38 atangin COVID-19 hri kai mi 17 hmuh leh niin nikum Nov. 10 hnuah ni khat-a hri kai hmuh an tam ber ni a ni a, hemi hmalam tun thla ni 22 khan hri kai mi 15 hmuh an lo ni leh tawh bawk a ni. Nimin khan hri kai mi 3 te enkawl dam niin hri kai enkawllai mi 38 an la awm a, an vai hian Aizawl District-a hri kai hmuh te vek an ni.

Thla thar May 9-a Chakma Autonomous District Council (CADC) inthlanna neih turah Candidate 74 an awm dawn ta. CADC-a MDC thlanna neih tura hming pekluh hun niminpiah a khar a nih hnuah nimin khan Nomination Paper thehluh te hi enfiah niin Bial 20 chuh tura Nomination paper 76 thehluh zinga 2 te hi a tul anga rin theih ni mah se pawm tel lovin mi 74 te Nomination paper chu pawm a ni a, heng Nomination Paper pawm te tan hian Vawiin chhun dar 12:00 thlengin inhnuhdawh theih a ni ang. CADC-a MDC Seat 20 hi BJP, INC leh MNF ten chuh vekin ZPM in Seat 13 an chuh bakah Independent Candidate 1 a awm bawk.

Mizoram Governor Hari Babu Kambham-pati chuan nimin khan PHE Official te leh Zopar Export aiawhte Raj Bhavan-ah kawmin tui-a harsatna an sawiho.

Lunglei South Bialtu MLA Dr. K. Pachhunga chuan nimin khan Jeevan Mission (JJM) hnuaia Rs. 89,99,800/- senga Upper Lungrang leh Lungrang khua chawmna tur Solar Water Pump chu a hawng a, Nizung chakna hmanga he Tui lakna hawn tak hi nikum January thla khan thawh tan niin tun thla ah thawh zawh a ni a, mi 1276 tana hman tura hisap niin mihring punna nen hisapin kum 2051 thlengin mihring 1684 ten tui thiang-hlim hnianghnar taka chawm tura duan a ni. In tinin inchhunga tui an herh haw theih turin Connection 384 pek a ni bawk.

Health Minister Dr. R. Lalthangliana chuan nimin khan District Hospital Champhai-ah RT-PCR Laboratory, Paediatric Intensive Care Unit (PICU) leh Trauma Centre te a hawng a, bungraw mamawh hrang hrangte dah nghal a ni. He hunah hian Health Minister chuan hmanraw changtlung tak tak nena thuam, damlo nazual enkawlna tur khum 50 awmna Critical Care Block (CCB) chu Mizoram-a hmasa ber turin cheng vbc. 20 senga din tum nih thu leh Integrated Public Health Laboratory (IPHL) pawh cheng nuai 120 senga din tum a nih thu a sawi bawk.

Mizoram Larsap Hari Babu Kambhampati chuan nimin khan Mizoram tlawha rawn zin Pudu-cherry sawrkar-a Rural Development changtu Minister AK. Sai J Saravanan Kumar chu Raj Bhavan-ah a kawm a, he hunah hian Larsap leh Puducherry Minister te hian State/UT pahnih dinhmun te an in hrilh a ni. Larsap chuan Mizoram in inkalpawhna kawngah hmasawnna a hmuh mek zel thu sawiin, Sairang-ah Rel a luh thuai a beisei thu leh ramchhunga National Highway te chu tihzauh leh thawmthat mek an nih thu a sawi bawk. Minister leh Governor hian Pudu-cherry leh Mizorama ni za inhlawhna (MG-NREGS) kalpui dan pawh an sawidun bawk a ni.

Champhai Vengthar-a Champhai Urban Primary Health Centre (UPHC) thar chu nimin khan Health Minister Dr. R. Lalthangliana chuan a hawng a, hriselna kawnga Champhai khawpui mamawhna phuhru tura Urban PHC hawn a ni chu lawmawm a tih thu sawiin, tunah hmun nghet la nei lo mah se hmunhma nghet building thar nena UPHC Champhai kalpui a nih theih nan hmalak zel a ni tih a sawi bawk.

Mizo Academy of Letters (MAL) chuan kum 2022 chhunga Mizo tawng Lehkhabu chhuak tha ber atana an thlan 'Daidanna Bang Phena Thuruk' tih ziaktu Dr. Zohmangaihi hnenah nimin khan chawimawina an hlan.

Nimin khan Governor Dr. Hari Babu Kambhampati huaihawtin LV Prasad Eye Institute, Hyderabad hotute chuan Mizoram sawrkar-a Health Department, Zoram Medical College (ZMC), National Health Mission (NHM), Synod Hospital leh Eye Care Hospital thuneitu chu thawhho dan tur an sawipui.

Rural Development Mnister Lalruatkima chuan Mizoram in hlawhtling taka MGNREGA Scheme-a kalpui theih chhan ber chu Department-a thawktute inpekna, thawhrimna leh beneficiary-te atanga tawiawmna tha tak a awm vang a ni, a ti.

Keitum leh Artahkawn inkar Tuichang lui-a cheng nuai 1014.20 senga Lei dawh thar chu nimin khan PWD changtu leh Chief Minister Zoramthanga chuan a hawng a, he Lei hi Central Roads Fund (CRF) leh Special Assistance to States for Capital Investment (SASCI) atanga sum hmuh hmanga dawh a ni.

Serchhip Sub-Hqrs. YMA Inkhawmpui vawi 7-na chu nizan khan Chhingchhip Playground-ah neih tan a ni.

Kar hmasa Nilaini-a Serchhip District-a COVID-19 hri kai hmuhchhuah, Serchhip Bazar Veng a mi chu nimin khan hri kai enkawlna atangin chhuahtir a ni ve leh ta a, heti hian Serchhip District-ah COVID-19 hri kai enkawllai an awm leh tawh lo a ni. Serchhip District-ah hian COVID-19 hri kai mi 14,618 hmuh ni tawhin an zinga 14,580 te chu enkawl dam an ni tawh a, hei kai zingah mi 36 an boral tawh a ni.

MPCC President Lalsawta chuan nimin khan Aizawl-a Congress Bhavan-ah MPCC Treasurer atanga Zodintluanga banna chu an Vice President Lal Thanzara leh an senior te nen an ngaihtuah ho ang tih sawiin, “A banna pawm tur a nih leh nih loh chungchang hi chu kan sawiho ang a, mipui hriatah kan la puang ang,” a ti.

Mizoram Police Aizawl District Special Branch (DSB) Team te chuan niminpiah tlai Crystal Methamphetamine nia hriat kg. 5.204 a rit chu Aizawl Laipuitlang-ah an man a, heng damdawi kawltu Maria Lalrotluangi (42), Champhai Kanan Veng nia inchhal pawh man nghalin an ruihhlo man hi cheng vbc. 10.4 hu vel nia chhut a ni.

LAD Minister K. Lalrinliana chuan nimin khan a Office-ah National Panchayat Awards-2023 'Nanaji Deshmukh Sarvottam Panchayat Satat Vikas Puraskar (NDSPSVP)' lawmman pakhatna dawngtu Ngopa Village Council te, Press mi te leh an Department Officials te leng-ah sawmin thingpui a inpui a, India ram a Panchayat 2,55,000 chuang zingah NDSPSVP Category-a lawmman pakhatna dawngtu Ngopa VC chu Mizoram tihmingthatu an nih avangin chhuanawm a tih thu a sawi a. Ngopa Village Council ten lawmman an lak pawisafai cheng nuai 150 pawh Central Sawrkar duhdan angin Ngopa khua hmasawnna hna thawh nan hmang ngei turin Ngopa VC te chu a ngen bawk.

Ruihhlo do beihpui thlakdan inzirtirna (Orientation) hun chu nimin khan MRB Main Office, Aizawl-ah neih niin Excise & Narcotics Minister Er. Lalrinawma chuan khuallian a hmanpui a, Minister chuan ruihhlo kaihhnawih in nghawng a neih nasatzia sawiin, ruihhlo dona kawngah mitin in mahni mawhphurnaah la a, mahni awmna hmun apiangah theihtawp chuah a pawimawh a ni, a ti. Sawrkar hnuaiah Excise and Narcotics Department, Police leh NGO ten ruihhlo tihrem nan 'Supply Reduction Prog-ramme' an kalpui mek a nih thu Minister chuan sawiin thalaite zinga ruihhlo hluar zel chung-changah zirbingna neih mek a nih thu leh, thalai/naupangte ruihhlo tilo tura zirtirna te pein, Demand Reduction Programme chu School, College leh hmun hrang hrangah te a kalpui reng thu a sawi bawk.

Tun thla ni 19 zing-a Lunglei District Jail atanga tang tlanchhuak zinga mi Lalchawimawia (24) chu nizan hmasa khan Hnahthial leh Thingsai inkar Khawhri khua mi te Thlam pakhat-ah man leh a ni a, amah hi Myanmar lam mi, |hangte khuaa awm thin niin Lunglei Chanmari Veng a tualthah thubuai-ah man niin Lunglei District Jail-a tang tlanchhuak mi 5 zinga 3 chu man an ni ta a ni. Lalchawimawia hi niminpiah tlai khan khaw dai-ah hmuh niin kawng dung-a Thlam ah te riak thei a nih avangin Hnahthial Police te nen inrawn tlangin nizan hmasa dar 10:30 vek khan Thlam hi hualin an man a ni.

PC Party chuan kumin MLA inthlanpui atana Campaign bul tanin nimin khan Aizawl-a an Party Office lailawk-ah Campaign Pamphlet an tlangzarh a. He hunah hian an Party President Vanlalruata chuan, “PC Party hi milian muthlu an sawi angin hun rei tak chu mihring nei teuh siin che hlei thei lovin kan awm a, tunah chuan kan lo tho chhuak leh ta,” a ti a. PC Party chu ram mamawha innghat policy nei a nih thu pawh a sawi bawk. Nimin-a tlangzarh Campaign Pamphlet-ah hian inthlan lo awm tura PC Party auhla tur tlangpui ziah a ni a, mipui hnenah semchhuah nghal a ni bawk.

Information & Public Relation Minister Lalruatkima chuan hnam fing leh mifing apiangin lehkhabu hlut zia an hria tih a sawi.

Kawlphetha MW 20 pechhuak thei tur Vankal Solar Park chu nimin khan Power & Electricity Department changtu Minister R. Lalzirliana chuan a hawng a, Vankal Solar Park hi cheng nuai 2107 senga din a ni.

Zirna leh Zirna atana Digital hmasawnna chungchang NGO leh Khawtlang hruaitute nena sawihona ‘Mizoram Conclave on C20 : Education & Digital Transformation’ chu nimin khan Mizoram University-ah neih niin Governor Dr. Hari Babu Kambhampati chuan khuallian niin a hmanpui a ni.

Serchhip-a District Treasury Office chuan Integrated Financial Management and Information System (IFMIS) kaltlangin sawrkar hnathawk te hlawh pekchhuah mek a nih thu an sawi.

Khawzawl-a MFA Cup khelh mekah Serchhip District aiawha khel FC Serchhip Kawnpui chuan Semi Final an lut ta. Nimin a MFA Cup khelh chhunzawm ah Group B atangin FC Ser-chhip Kawnpui leh Saitual District aiawh Mel Veng FC te an inhmachhawn a, goal thum ve ve inpe-a inhnehtawkin FC Serchhip Kawnpui tan Felix Lalruatsanga chuan goal hmasa ber a khung bakah Gospel Darthanmawia chuan goal hnih a khung a ni. An Group-a inkhel dang ah Lawngtlai Vengpui FC in Mamit Field Veng FC chu 3-1 in an hneh bawk a, heti hian Group Match vawi thum theuh an khelh an Lawngtlai Vengpui FC in point 6 hmua Group Winner niin Semi Final an lut a, FC Serchhip Kawnpui leh Mel Veng FC ten point 4 ve ve hmuin GD tha zawk FC Serchhip Kawnpui in Semi Final an lut ve bawk a ni.

Keitum leh Khawlailung inkar Artahkawn Road Tuichang lui a Double Lane Built-Up Steel Girder Bridge dawh thar chu Vawiin chawhma dar 11:00 hian PWD changtu Chief Minister Zoramthanga chuan a hawng dawn a, he hun hi bialtu MLA leh Home Minister Lalchamliana pawhin a hmapui ang.

Mizoram State Sports Council (MSSC) leh Serchhip District Football Association (SD-FA) tangdun chuan Serchhip District chhunga Football Grassroots Centre 5 tan Vawiin leh naktuk hian Serchhip Sports Complex-ah Football Tournament an buatsaih dawn a. District Bawrhsap in a hmanpui dawn a ni. He Tournament ah hian Serchhip, Chhiahtlang, North Vanlaiphai, Thenzawl leh East Lungdar Centre te an tel dawn a ni.

India Sipaite chawimawina sang, Gallantry Award chu Champhai District Jail-a Guard 2 te chuan an dawng a, he chawimawina dawngtute hi Mizoram Home Guard and Civil Defence sipai pahnih Lance Corporal Lalhruaitluanga leh Guardman K. Lalthalura te an ni a, an duty na ah an rinawm avang leh an huaisen avangin Gallantry Award hi dawngin tun thla ni 17 khan hlan an ni.

Tunlai hian Social Media-ah Mizoram-a sahimna zawnga Myanmar atanga rawn kal te zingah Birth Certificate nei an awm ni a sawi a ni a, hemi chungchangah hian Farkawn Joint YMA chuan thuchhuah siamin, zaithiam Benjamin Sum-a’n Farkawn khuaa piang anga Birth Certificate a nei chu chhui zui turin Dungtlang Police Station-ah FIR an thehlut nia thudawn a ni bawk.

Nimin khan Mamit DC Office kum 25-na (Silver Jubilee) lawmna chu Mamit DC VL. Remliana kaihhruaiin Mamit Conference Hall-ah neih a ni a, he hun hi Mamit DC hlui Nghak-lianmawia MCS (Rtd) chuan khuallian niin a hmanpui a ni. Mamit District hian kum 25 chhung hian DC 17 nei tawhin April 24, 1998 khan Z. Lalhmingliana MCS hovin DC Office hi Mamit Hmar Veng-ah mi In luahin bul tan a ni. Nimin-a he hun hmanna ah hian Mamit DC hlui leh MPSC Chairman Vanlalngaihsaka bakah Sub-Hqrs. YMA hruaitute pawhin thu an sawi bawk a ni.

Thla thar May ni 9-a Chakma Autonomous District Council (CADC)-a MDC thlanna neih turah nimin khan inthlan chuh tum chuan Nomination Paper an thehlut a, MDC Seat 20 a inthlanna neih turah BJP, INC leh MNF chuan seat awm zawng zawng chuhkim turin Candidate 20 theuh an nei dawn a, ZPM chuan nimin khan an Candidate tur mi 4 puan belhin bial 13-ah Candidate an nei dawn a ni. He inthlan chuh tum te tana Nomination Paper thehluh hi Vawiin ah enfiah a ni anga, tun thla ni 27 thleng khian inhnukdawk duhte tan hun hawn leh a ni anga, May 9-ah Vote thlakin May 11-ah Vote tla te chhiar a ni ang.

Mizoram Rural Bank (MRB) Chairman V. Jayachandra chuan nimin khan Aizawl-a a Pisa-ah chanchinbumite kawmin Financial Year kalta chhungin MRB-in cheng vbc. 65.19 a hlep tih a sawi a, Financial Year hmasaah cheng vbc. 49.44 an hmuh thu sawiin, tun tuma an hlep zat punna hi zaa 32.06 lai a nih thu a sawi bawk. Hei bakah hian MRB Chairman chuan CSR hnuaiah cheng vbc. 1.81 an pekchhuah thu leh MRB-ah Bank Account nei mi 9,66,580 an awm thu a sawi bawk.

PC Party President Vanlalruata chuan sawrkar hnathawk te hlawh pe thuai tura an phut thu nimin khan a sawi.

Mizoram sawrkar-a Health & Family Welfare Department hnuaiah Transgender (Mipa hmeichhia-a in let/hmeichhia mipa a in let) Persons (Protection of Rights) Act, 2019, Section 11 in a sawi angin, Complaint Officer ruat a ni tawh.

Mizoram Pradesh Congress Committee (MPCC) chuan IFMIS hnuaia harsatna chu IFMIS System-ah thil fello tam tak a awm vang a nih thu an sawi.

Mizo Zirlai Pawl (MZP) chuan nimin khan thuchhuah siamin tunlaiin Social Media lamah Zofate inpumkhatna tichhe thei zawng thawm a ri chu pawi an tih thu leh an rilru a tihnat thu an sawi a, Zofate chu an duh vang ni hauh lovin thendarha awmin, sawrkar pathum hnuaiah an awm mek tih tarlangin, heng heng hmun hrang hranga awm Zohnahthlak te hi an inpumkhat theih nan hma an lak thu leh khawi hmuna cheng pawh nise, ram dang mi enin an en thei lo tih an sawi a, hetiang rilru hi Zohnahthak hmun hrang hranga awm te pawhin pu se an duh thu an sawi bawk.

Mizo Zirlai Pawl (MZP) General Headquarters hruaitute chuan nimin khan Governor Dr. Hari Babu Kambhampati chu a Pisa-ah hmuin MZP hmalaknate an sawipui bakah thil pawimawh dang te sawipuiin heng ah te hian hma lak pui turin Governor chu an ngen nghal bawk.

India hmarchhak a Survey of Villages Abadi and Mapping with Improvised Technology in Village Areas (SVAMITVA) Scheme hnuaia Property Card semchhuahna hmasa ber chu nimin khan Phulpui leh Tachhip-ah te neih a ni.

Health Minister Dr. R. Lalthangliana chuan Mizoram chhunga Health Department hnuaia District then hran pakua zinga panga chu Malaria umbo mai thei dinhmunah a ding tawh tih a sawi.

National Medical Commission (NMC) hotute chuan ZMC a MBBS pass thar te Internship tan an remti.

Nimin khan ‘Ruihhlo do khuh hawnna’ chu Excise & Narcotics Minister Er. Lalrinawma hovin Aizawla Assembly Annexe Conference Hall-ah neih a ni a. He hunah hian ruihhlo dona kawnga hmalakna atan thawktu hrang hrangte hnenah cheng vbc. 3 semchhuah a ni.

Tun thla ni 16-a Thenzawl khuaa COVID-19 hri kai hmuhchhuah mi pakhat chu Zirtawpni khan enkawl dam niin nimin thleng khan Serchhip District-a hri kai enkawllai mi pakhat a la awm a. Mizoram pumah hri kai enkawllai mi 29 la awmin Aizawl District-ah 25, Khawzawl leh Kolasib District-ah 2 ve ve leh Serchhip District-ah pakhat te an ni.

Hripui leng vanga Mizoram-ah a thlawna thisen pek zat tlahniam mahse tunhnaiah erawh a sang chho leh hret hret a. Nikum chhung khan Mizoram-a Blood Bank hrang hrang te chuan thisen Unit 37,419 an la a. Serchhip District Hospital-a Blood Bank pawhin thisen Unit 960 an la a ni.

Kumin-a Mizoram in Assembly inthlanpui a hmachhawn tura inbuatsaihna kal chho tan mekah inthlanna a hman tur Vote thlakna khawl te chu Inrinni khan Serchhip rawn thlenpui a ni a, Pindan Awmkhauh-ah dahluh nghal a ni. Ser-chhip District-a Vote thlakna khawl, EVM leh bungraw thenkhat te hi State dang inthlanna a hman a nih bakah Company lam ten an enfiah hnua tha tawk lo thei te lakchhuah a ni a, kumin hian Mizoram in Assembly inthlanpui a hmachhawn dawn avangin Vote thlakna khawl te hi hman theih turin venhimna hnuaiah Mizoram rawn thlenpui a ni leh ta a ni. Serchhip District chhung Assembly bial 3-a hman tur Vote thlakna khawl, Controlling Unit 40, Balloting Unit 6 leh VVPAT 15 te pawh Inrinni tlai khan Serchhip rawn thlenpui niin Election Officer Lalrinsanga Hnamte leh Political Party aiawh ten lo dawngsawngin Pindan Awmkhauh-ah dahluh nghal a ni a. Tun dinhmunah inthlanna a hman tur mamawh tawk Vote thlakna khawl hi an kawl tawh thu Election Office-a thawktute chuan an sawi bawk.

Serchhip Dinthar Branch YMA te chuan Inrinni khan Mat Lui an humhalh mekah hnatlang neiin luidung humhalh chhinchhiahna te an tar thar leh a. Serchhip Dinthar Branch YMA hian Mat lui Mualvawm chhuah atanga Zangena kai, meter 880-a thui chu humhalhin hemi huamchhung ah hian luidung nungcha te eng hmanrua mahin man an phal lo a, he hnatlang ah hian luidung humhalh chhinchhiahna chi hrang hrang tarin Sangha chaw te pawh an pe nghal bawk a ni. Serchhip Dinthar Branch YMA hruaitute chuan mipuite tlawhpawh tam, Chawm kai-a kal ten hnawmhnawk an neih te halralna tur hmun an siam nghal bawk a, hei hi mipuite pawhin hmang tangkaiin bawlhhlawh tawih thei lo te paih darh mai mai lovin helai hmunah hian halral thin se an duh thu an sawi bawk a ni.

Nimin Pathianni hmang khan Mizoram Presbyerian Kohhran (PCI) chuan Pastor Bial Inkhawmpui hmun hrang hrangah neiin Inrinni khan khawmpui Palai ten rorelna an nei a. Serchhip Pastor Bial Inkhawmpui Bethel Kohhran a neih chuan ‘Chanchintha thlen ni March ni 15-a kan hman thin hi January 11-ah hman ni leh tawh rawh se’ tih Agenda lut chu pass in Presbytery Inkhawmpui a chhawpchhuah leh turin an rel a. New Serchhip Pastor Bial te New Serchhip Kohhran-a Inkhawmpui pawhin ramngaw leh nungcha humhalh kawngah Kohhran in hma lak an rel bawk. Heng bakah hian Serchhip Vengchung Pastor Bial inkhawmpui Serchhip Chhim Veng Kohhran-a neih pawhin ruihhlo ngai chhan-chhuah kawngah Kohhran in hma lak dan kawng zawn an rel bawk. Heng Bial Inkhawm-pui hi nizan khan an tiak a ni.

Inrinni tlai dar 4:30 vel khan Tlungvel khua ah kangmei chhuakin chenna In 4 a kang a, mi pakhat in hliam a tuar bawk. Kangmei hi T. Lalhriatpuia dawr atanga intan niin Welding Machine hmanga hna thawkin hei hian Petrol an lo chhekkhawl chu manin kangmei hi a chhuak a, kangpui kam tuak-a In pahnih ve ve chu an bungrua chuh hman lohin a kangral a, In pakhat chu a kankai hmain thiah a ni bawk.

Thla thar May 9-a Chakma Autonomous District Council (CADC)-a MDC thlanna neih tura chuh tumte tana hming pekluh theih hun chu Vawiin hian a tawp dawn ta a, Inrinni thleng khan inthlan chuh tura hming pelut hi an la awm lo a ni. MDC Seat 20 awmna CADC-ah hian BJP, Congress leh MNF te chuan Seat awm zawng zawng chuh turin leh ZPM in Bial 9 chuh turin Candidate an puang tawh a ni.

Sialkal Range Development Council (SR-DC) chuan huamchhunga pawl 9 leh pawl 11 topper zirlai 13 te tan New Delhi-ah Excursion buatsaihin heng mite pual hian Inrinni khan Aizawl-a SRDC Office-ah hun hman a ni a, he hun hmanpuitu SRDC Chairman Dr. L. Thangmawia MLA chuan kumin HSLC leh HSSLC exam-a SRDC area huamchhung zirna in atanga Distinction-a pass te chu Smartphone leh Laptop pek an nih tur thu a sawi.

Central YMA hruaitute chuan Zirtawpni khan an President R. Lalngheta hovin sahimna zawnga Burma atanga rawn tlan Zokhawthar Camp a awm te an tlawh a, Central YMA President chuan Myanmar atanga rawn raltlan Zokhawthar-a awm te dinhmun chiang tak an hriat duh avangin a hmun ngeiah an kal tih sawiin, “Raltlan awm rei tawh leh awm nghet deuh te hi chu ei leh in anmahni a an indap tir dan hi kan zawn ho a tha khawp mai,” a ti. Zokhawthar ah hian tun dinhmun ah raltlan mi 5604 an awm mek a, Zokhawthar Field-ah an chenna In tur siam a ni a, an len loh avangin hmun danga sawn tum niin a sawnna tur pawh hi sak mek a ni bawk.

Home Minister Lalchamliana chuan Inrinni zing khan Lunglei-a District Jail tlawhin Jail Ward hrang hrangte leh Superintendent Office te tlawhin District Jail dinhmun a enfiah a. District Jail-ah hian Staff dah belh a tul thu leh Superintendent Office Vertical Extension a tul thu a hnena an lo thlen chu a theih anga lo bawhzui a tum thu a sawi a, Jail hungna repair that ngai lai te enfiahin hmalak nghal a nih tur thu a sawi bawk. Home Minister hian tunhnaia Jail tang tlanchhuahna an tih hmun te enfiahin Jail tang te harsatna tawh leh tawh loh a zawt a, Jail tang te hian ei leh in, tui chungchangah te harsatnna an tawh loh thu an lo hrilh bawk.

Muslim ni pawimawh Eid-Ul-Fitr chu Inrinni  khan hmun hrang hrangah hman niin Aizawl-ah chuan Chaltlang Field-ah Aizawl Mosque Imam Bilal Ahmed hoin urhsun taka hman a ni a, a huhova tawngtaina hun hman a ni bawk. Ramadan tawpna ni, Eid hmanna ah hian Aizawl Mosque Committee leh Mizoram Muslim Welfare Society General Secretary ni bawk Mamon Majumdar chuan thu a sawi a, an mi leh sate chu Mizorama an awm chhungin an hna tur dik tak, dan ang thlapa thawk turin a chah a, Mizoram mipuite zarah chhungkaw engemaw zatin ei leh bar zawnna an nei thei tih sawiin, Mizo mipui chungah lawmthu a sawi bawk. He ni-ah hian Serchhip-a Muslim te pawhin Tui-khuah Veng-ah a huho-a tawngtaina hun an hmang bawk a ni.

Aizawl Hmathlir Pawl tia in vuah te chuan Zirtawpni khan Aizawl Press Club-ah inrawnkhawmna neiin Assam Rifles-in Aizawl-a ram an luah mek chu an chhuahsan hunah thildang atan ni lo, Urban Park atan hman a nih theihna'n theihtawp chhuaha hmalak nise an ti a, he hmalakna tawiawma tuipui tu pawl hrang hrangte thawhpuia sawm an rel bawk.

Kum 2022-23 chhungin Aizawl Zoological Park (Aizawl Sahuan) tlawh mi 72,245 an awm a, heng atanga sum hmuh zawng zawng chu Rs. 12,03,120 a ni.

Aizawl khawpui chawmna tura Tanhril Setlak ram-a Tui lakna, 'Augmentatio of Water Supply and Construction of 37 MLD Water Treatment Plant' siam mek chu Inrinni zing khan UD&PA Department changtu Deputy Chief Minister Tawnluia chuan a hmunah a tlawh.

Mizoram State BJP President Vanlalhmuaka chuan an party zawm duh tupawh an welcome vek thu te a sawi.

MPCC Treasurer atanga banna a thehluh hnuah Zodintluanga MLA chuan Congress Party chhuahsan tumna a neih loh thu a sawi. Zodintluanga chuan an party that zawkna atana banna thehlut a nih thu sawiin, Congress Party atanga bang a nih loh thu leh an sawrkar leh ngei theihna atan theihtawp chhuah a tum zel tih a sawi a, Congress Party tan a la tang sauh dawn chauh tih sawiin, tunkar hian West Phaileng lamah zin a tum thu leh a zin chhan tur pawh Congress Party programme a nih thu a sawi a, a bial lamah pawh an party programme an duan thu a sawi bawk. Congress-a a MLA pui thenkhatte nena BJP zawm tur anga Social Media-a sawi awm, thenkhatin ZPM zawm anga an sawi leh BJP zawm tum anga an thehdarh chungchangah a engamah zawm tumna a neih loh thu leh Congress Party a sawrkar leh theihna atan theihtawp a chhuah dawn tih a sawi bawk.

Home Minister Lalchamliana chuan Zirtawpni khan Lunglei Fire Station tlawhin April 24-26, 2021 chhunga Lunglei chhehvel ramkang vak thelhmih kawng a theitawp an chhuah avanga India ram pum huap a hnathawh that chawimawina, Subash Chandra Bose Aapda Prabandhan Puraskar 2023 an dawng chu a lawmpui thu leh a chhuan thu a sawi a. “Mei hi a tangkai a, a lehlam ah chuan chhiatna rapthlak tak thlentu a ni,” tiin, kangmei ven kawngah thawhona tha tak nen theitawp chhuah theuh turin thawktu te a chah a ni. 15th Finance Commission in India ram puma Fire Station tih changtlunna tura sum cheng vbc. 1500 ruahman atangin Lunglei District tan cheng vbc. 5 a beisei thu a sawi a, hemi hmang hian Lunglei Fire Station leh Quater sak a nih tur thu a sawi bawk.

Mizoram Pollution Control Board (MPCB) chuan Mizorama a kum tela khawlum chho chu lirthei pung chak lutuk vang leh enkawl that tawk loh avang a nih thu a sawi.

Nikum (2022) April atanga kumin (2023) March inkar khan Child Welfare Committee (CWC) chuan Case 862 an chingfel a, hemi hun chhung vek hian Juvenile Justice Board (JJB) chuan Case 208 an chingfel bawk.

Serchhip Agriculture Complex-a Bekang herna tur khawl, Mini Oil Expeller bun thar chu nimin khan Agriculture Minister C. Lalrinsanga chuan hawngin hemi rual hian Serchhip District chhunga Oil Palm chingtute hnenah Oil Palm rah lawhna tur Leilawn leh Hreite chu a hlan nghal bawk.

Serchhip District Superintendent of Police (SP) thar Vanlalnghenga MPS chuan nimin khan a Pisa-ah Serchhip District-a MJA Member te leng-ah sawmin, mipuite nen thawhhona tha tak nen Dan leh thupek kenkawh hna thawh an duh thu a sawi.

Ramchhung hmundangte rualin nimin khan Serchhip-ah pawh Civil Services Day, 2023 chu District Bawrhsap Nazuk Kumar IAS hovin hman a ni.

Nimin khan Serchhip DC Meeting Hall-ah District Level Committee on PMMSY chu an Chairman leh District Bawrhsap Nazuk Kumar hovin an thukhawm a, he hunah hian kum 2023-2024 leh 2024-2025 chhunga Serchhip District chhunga Fisheries Department hmalakna tur atana Action Plan an duan chu thlirho in an pawm a ni.

Catholic Hmeichhe Pawl Our Lady Assumption Parish Serchhip Inkhawmpui vawi 24-na chu nizan atang khan Serchhip Dinthar Veng a St. James Church-ah neih tan a ni a, he inkhawmpui-ah hian Thupui atan ‘Lalpa hnenah tlulut phawt mai ila’ tih chu hman niin Speaker atan Rev. Fr. Patrick Khupzalian, SDB (Thenzawl) chu hman niin naktuk Pathianni zan thleng he inkhawmpui hi neih a ni ang.

Mizoram Presbyterian Kohhran chuan nizan atang khan Pastor Bial hrang hrangah Bial In-khawmpui an nei tan a, Serchhip Pastor Bial chuan Serchhip Bethel Kohhran Biak In-ah Bial inkhawmpui hi neiin Serchhip Vengchung Pastor Bial ten Serchhip Chhim Veng Kohhran Biak In-ah leh New Serchhip Pastor Bial ten New Serchhip Kohhran Biak In-ah Bial Inkhawmpui hi an nei a. Nizan khan Report hrang hrangte ngaihthlak niin Vawiin hian Khawmpui Rorel Inkhawm neih a ni ang. Presbyterian Pastor Bial inkhawmpui hi naktuk Pathianni zan-ah a tiak dawn a ni.

Keitum leh Khawlailung inkar Tuichang lui a Lei (Steel Girder Bridge) dawh thar chu tun thla ni 25 khian Chief Minister Zoramthanga chuan a hawng dawn a. Hei vang hian nimin atang khan he Lei hi lirthei zawh theih loh tura khar leh a ni. He Lei khar a nih chhung hian a bula Lei (Beiley Bridge) chu lirthei tan zawh theih a ni dawn thung a, lirthei 10MT aia rit lo phur te tan he Lei hi zawh theih a ni ang.

Nimin chawhma dar 10:50 vel khan Rajiv Nagar atanga Marpara kal tur Pik-Up pakhat chu West Phaileng khawchhungah chesualin mi 5 an thi a, an zinga 3 chu a hmuna thi niin midang pahnih hi damdawi In panpui an nih hnua boral an ni. He Motor-ah hian mi 25 vel zet an chuang nia sawi a ni a, Marpara khua mi te ni hlawmin Rajiv Nagar-a Biju Festival hmanga kal te nia hriat a ni bawk.

Nimin khan Champhai-a District Legal Services Authority bultumin Champhai Judicial District huamchhunga pawikhawihna tuartu mi 26 te hnenah zangnadawmna, Victims of Crime Compensation chu Rs 87,25,000/- sem-chhuah a ni a, he hun hi District & Sessions Judge Liansangzuala chuan hmanpuiin he Scheme ruahman chhan leh zangnadawmna pek theih dan te a tarlang bawk a ni.

Home Minister Lalchamliana chuan nimin khan Tlabung bul, Kawrpuichhuah-a India leh Bangladesh te an insumdawntawnna hmun tur chu a tlawh a, Bangladesh nena insumdawn tawnna tura ruahmanna ti puitling turin Mizoram Sawrkar-in theihtawp a chhuah zel tih sawiin, ram pahnihin inremna an siam zulzuia hma lak zel a ngaih thu a sawi a. Kawrpuichhuah Integrated Check Post-in a ken tel, inkalpawhna lei dawh kai tur chu a ruangam duan danah tih fuh tawk loh a awm vanga tih that leh mek a nih thu leh ruahman ang chuan, Home Department lam pawhin Immigration Check Post bun an tum thu a sawi bawk.

UD&PA Department changtu Deputy Chief Minister Tawnluia chuan nimin khan Aizawl Thakthing Veng-a Government Multi Utility Centre chu a hawng a, Government Multi Utility Centre hi UD&PA Department hmalakna in cheng nuai 884.73 senga sak a ni a, kum 2019 May thla khan sak tan niin kumin January thla tawp khan sak zawh a ni. He Multi Facility Centre-ah hian Parking, Office, Weekend Market leh Auditorium te awm thei tur a buatsaih a ni. Government Multi Utility Centre hawnna hunah hian Deputy Chief Minister chuan mipuite tan a hna kan thawh hian a sum senso lam ringawt ngaihtuah lo in hna tha, tlo leh rintlak tur kan ngaihtuah a pawimawh a ni, a ti bawk.

Food Corporation of India (FCI) Mizoram chuan nimin khan an Chairman Rajya Sabha MP K. Vanlalvena hovin Aizawl-ah State Consultative Committee Meeting an nei.

Mizoram Pradesh Congress Committee (MPCC) Treasurer Zodintluanga chuan nimin khan Party-a a nihna atanga a banna Party Office ah a thehlut.

Khawzawl-a MFA Cup khelh mekah nimin khan Serchhip District aiawha kal FC Serchhip Kawnpui chu Lawngtlai Vengpui FC lakah an tlawm.

Serchhip District Superintendent of Police (SP) thar Vanlalnghenga chuan nimin khan Serchhip District-a NGO Coordination Committee hruaitute a Pisa-a leng-ah sawmin inkawmna an nei.

CT Group of University, Punjab sponsore a Govt. Higher Secondary School, Serchhip a zirlaite leh zirtirtute Punjab-a kal te chuan nimin khan Serchhip an rawn thleng leh ta.

Tuikum bialtu MLA leh Minister Er. Lalrinawma chuan nimin khan a Bial chhung khaw thenkhat a hmasawnna hnathawh hrang hrangte tlawhin a dinhmun a enfiah.

Govt. Serchhip College-a National Service Scheme (NSS) leh 42nd Bn. Assam Rifles, Ser-chhip bultumin nimin khan Govt. Serchhip College-a NSS, NCC leh Red Ribbon Club te chuan kumin August 25-a Govt. Serchhip College kum 50 tlinna tur pualin Serchhip Blood Bank-a dah turin thisen Unit 62 an pe a, thisen petute hi mipa 35 leh hmeichhia 27 niin Blood Bank a thawktu ten College-ah kal chilhin heng mi tlawmngai te thisen hi an lak sak a ni. Govt. Serchhip College hian kumin August 25 khian kum 50 a tling dawn a, he Jubilee lawmna pual hian kawng hrang hrangin hmalak a ni dawn a ni.

BJP Mizoram Pradesh chuan Chakma Autonomous District Council (CADC)-a CEM hlui leh MNF MDC ni mek Amit Kumar leh amah zuitu mi 600 te chu nimin khan BJP-ah lawmluh an nih thu thuchhuah siamin an tarlang a, he hunah hian Amit Kumar chuan CADC inthlan lo awm turah MNF in Ticket pek an tiam laiin an pe ta lo tih sawiin, “Hei hian MNF Leadership that loh zia alan tir avang leh an thutiam ah an din tak loh avang leh an rinawm loh zia ka hnuh hian MNF hi awm reng na chi ah ka ngai lo,” a ti. BJP hian Vawiin hian CADC-a an Candidate turte an puang dawn a ni.

Aizawl Judicial District-a District & Sessions Judge Vanlalenmawia hovin nimin khan Mamit District Court-ah Under Trial Review Meeting neih a ni a, Under trial jail-a tang mekte an tan hun tur bituk hun chanve aia tam tangte bail a chhuah an nih theih dan ngaihtuah chu he Meeting in a tum ber a ni a, hetianga chhuah theih hi an awm lo a ni. Hemi hnu hian Mizoram Victims of Crime Compensation Scheme hnuaia an District-a dilna lut 20 te chungchang pawh ngaihtuah chhunzawm nghal a ni a, District & Sessions Judge hian Mamit District Jail pawh a tlawh nghal bawk.

Law & Judicial Minister TJ. Lalnuntluanga chuan nimin khan Champhai Electric Veng-a Champhai Higher Secondary School chu tlawhin thawktute nen inkawmna an nei a. Champhai South huamchhungah zirna sang zawk a awm remchan mai loh vangin kum 2019 ah Champhai South Higher Secondary School din a nih thu sawiin, School dinhmun tha zawk leh thawmthat kawngah pawh theihtawp chhuah zui zel niin project-te siam a nih thu a sawi a, he School tan hian Rs. 50,000/- a pe nghal bawk.

Nimin khan Mamit District Disaster Management Authority, 1st Bn. NDRF leh BDO Zawl-nuam te tangkawp buatsaihin Langkaih lui Area a YMA leh thalai tlawmngaite tan tui tla chhanchhuah leh tui tla zawnga chetchhuah dan inzirtirna neih a ni a. He inzirtirna hi BDO Conference Hall leh Zawlnuam Bawrai lui-ah neih niin Langkaih lui kama khaw hrang hrang 8 aiawh thalai tuithiam mi 30 vel te an tel a, 1st Bn. NDRF te hian Tui tla chhan dan leh lawng hman dan te, lawng hmanga tuitla chhanchhuah dan leh chet dan turah zirtirna an pe a ni.

AMC huamchhung Local Council pathum a bye-election chu niminpiah khan neih niin result pawh hriat kim theih a ni ta a. Seat 7 awmna Zema-bawk LC thiah a nih avanga bye-election neih ah ZPM Candidate te thlantlin vek niin he Local Council-ah hian ZPM sawrkar a ding dawn a, Local Council Seat ruak pakhat awmna Durtlang Leitan LC Council inthlan ah ZPM Candidate H. Lalbiakkima chuan amah hnaih bertu MNF Candidate Rinmuanpuia chu Vote 700 chuangin a hneh a, ITI Local Council Seat ruak pakhat hnawhkhat tura inthlanna ah MNF Candidate Lalpianmawia chuan amah hnaih bertu ZPM Candidate Ricky Vanlalhruaia chu vote 118 in a hneh bawk a ni.

Nimin khan Lunglei-ah District Level Socio-Economic Development Policy (SEDP) Committee chu an Chairman leh Lunglei Bawrhsap Ramdinliani IAS hova thukhawmin Family Oriented SEDP Phase 2 kalpui dan tur an sawiho a. He hunah hian Lunglei DC chuan SEDP Line Department te chu an hnuaia beneficiary te theihtawp chhuahpui tura chahin beneficiary te kaihhruai leh vil zui kawngah thahnem ngai taka hma la turin a chah a ni. Lunglei District-ah pawh Family Oriented SEDP Phase 2 hi Constituency tinah beneficiary 1400 te dawng tura tih niin beneficiary thlan te chu Village Level SEDP Committee ten District Level Committee-ah an thehlut anga. Hei hi April 23, 2023 hmaa thehlut tura tih an ni.

Mizoram Board of School Education (MBSE) bultumin nimin khan Kolasib-ah MBSE hnuaia High School leh Higher Secondary School zirtirtute tan ‘Capacity Building of Teachers in Setting Higher Order Thinking Skills (HOTS) Question’ tih thupui hmangin ni khat awh training neih a ni a. He hunah hian National Education Policy 2020 chungchang te, Pawl 9 leh pawl 10 Science leh Mathematics zirlaibu a tawng chi hnih hman chungchang sawi zauna leh Exam buatsaih leh Integrated Evaluation Scheme (IES) kalphung behchhan a zawhna siam dan te inzirtir a ni. MBSE chuan kum 2020 atang khan High School leaving Certificate leh Higher Secondary School Leaving Certificate exam dan leh zawhna siam dan kalphung chu her danglamin chhanna awmsa atanga chhan theih chi (Content based question) atangin zirlaiten anmahni irawm chhuak atanga chhan chi (Competency based question) zawhna tam zawk zirlaite hnenah chhawpchhuah tum a ni a. Mizoram chhunga District 11-a zirtirtute hnenah zawhna siam dan chungchang zirtirna...

Environment, Forest & Climate Change (EF&CC) Minister TJ. Lalnuntluanga chuan nimin khan Champhai Sub-Hqrs. YMA Inkhawmpui vawi 8-na chu Champhai Ruantlang-a Vanhnuailiana Hall-ah a hmanpui.

Lunglei District Youth Congress Committee (LDYCC) chuan Lunglei District Jail-a tang mek mi 5 te awlsam taka an tlanchhuah theih chhan chu Mizoram sawrkar-in District Jail Lunglei a hlamchhiah vang leh a tih tur a tih loh avang ni-a an ngaih thu an sawi.

Niminpiah zing-a Lunglei District atanga tang tlanchhuak mi 5 zinga mi nia hriat mi pahnih te chu nizan khan Lunglei District-a Mausen khua ah man an ni.

Deputy Chief Minister Tawnluia chuan SMART City hnuaiah cheng vbc. 500 in Aizawl khawpui cheithat nan thawh mek a nih thu a sawi.

Chief Minister Zoramthanga chuan hun reilote ah Adhoc School thenkhat chu Provincialise tum a nih thu a sawi.