MUP General Assembly Minister in a hmanpui

Mizoram Upa Pawl (MUP) General Assembly Vawi 48-na chu nimin khan Social Welfare Minister, Er. Lalrinawma chuan Aizawl Vanapa Hall-ah a hmanpui.

MUP General Assembly-ah hian Minister Er. Lalrinawma chuan MUP Member nih chu thil ropui a nih thu sawiin, MUP member te chu nun hriat tam tak lo paltlang tawh, mi hriatthiamna thuk tak nei an ni tih sawiin, MUP chu pawl tam tak zinga a khaitu a nih thu a sawi a. Kum chu number chhiarna mai a nih avangin lunglenna a nun uai liam tir mai lova thatho leh beiseina nung nei turin a chah bawk. Social Welfare Minister chuan Old Age Pension chungchang pawh sawiin, October 2022 atanga March 2023 chu dil mek a nih thu leh  lak thuai theih a nih a beisei thu a sawi bawk.

Report-a a lan danin MUP General Headquarters hi Aizawl-ah awmin District Headquarters chu hmun 8-ah an nei bawk a, Branch 586-ah members 64100 a nei a ni. Hmalakna pawimawh tak tak kalpui niin member-te tangkai pui theih tur Training-te buatsaih thin a ni a, Charity Fund Board kaltlangin tanpui ngai te hnenah tanpuina sem thin a ni. Nimin-a MUP General Assembly hi an President Lalhuapzauva chuan kaihruaiin chawhnu lamah hruaitu thlanna neih nghal a ni bawk.