Jail tang 5 tlanchhuak

Nimin zing dar 1:30 vel khan Lunglei District Jail-a tang mi 5 te chu an tlanchhuak a, man leh tuma zawn mek an ni.

Lunglei District Jail Superintendent Zosanga sawi danin nimin zing dar 1:30 vela Jail Duty-in Ward a fan lai chuan heng tlanchhuak ta te hi an la awm vek a, hemi hnu lawk zing dar 2:15 khan an tlanchhuak tih hriat a ni a. Heng tang tlanchhuak te hi Ward No. 2-a awm niin Ek In bang Brick rem chu mihring leng tawka tichhiain an chhuak a, Jail hungna Lungbang sang tak chunga thirlen zam-ah an chhuak nia hriat a ni. Jail atanga tlanchhuak an awm tih hriat a nih veleh an theih ang angin an zawng nghal a, khawvar hnuah Jail hungna hmun 2 atanga tlanchhuak an nih an rin thu sawiin, Chappal an hmuh thu a sawi bawk. Jail atanga tang tlan-chhuak an awm avang hian Jail Superintendent chuan Lunglei Police Station-ah FIR a thehlut nghal a, SP leh Addl. SP te pawhin Jail hi tlawh nghalin tang tlanchhuak te man an nih theih nan hma an la nghal a ni.

Lunglei District Jail atanga tlanchhuak te hi kum 2021-a Lunglei Chanmari-a nu pakhat vithlumtu a puh Lalchawimawia (24) leh ruihhlo vanga man mi 4 – Lalbawihliana (27) Zokhawthar; Dokapthang (26) Zokhawthar; Haudeihchhin (25) Tlangnuam, Champhai District leh Vanneihthanga (38), Leisen Myanmar te an ni.

Thudawnna in a tarlan danin Sazai-kawn-a Lunglei District Jail-ah hian Jail hungna hrulah Duty post 7 awmin tun dinhmunah Duty post 3-ah chiah Home Guard duty-tir an ni a. Thawktu indaihloh vangin Duty Post 4 chu dah tawl a ni a. Jail hi mi 109 awmna tura tih ni mah se mi 151 an tang mek a. Ward pakhatah mi 27 awm tura tih a nih laiin mi 60 an awm mek a. Hmeichhia tang 16 an awm ve mek bawk.

Comments

Popular News (Last 30 Days)

LPG man bithliah thar