Mizoram in hlawhtling taka MGNREGS a kalpui theih chhan inpekna leh thawhrimna vang a ni tih sawi

Rural Development Mnister Lalruatkima chuan Mizoram in hlawhtling taka MGNREGA Scheme-a kalpui theih chhan ber chu Department-a thawktute inpekna, thawhrimna leh beneficiary-te atanga tawiawmna tha tak a awm vang a ni, a ti.

Mizoram in MNREGA Scheme-a kalpui dan zirchiang tura lo kal Puducherry DRDA Minister AK. Sai J Saravanan Kumar leh a Team te nen nimin-a Aijal Club-a inkawmna an neih ah RD Minister chuan he thu hi sawiin, rethei leh khawsak harsa zawk te tanpui chu sawrkar thiltum lian ber pakhat anih avangin MGNREGA chu uluk, felfai leh dik taka kalpui anih thu a sawi a. Mizoram chu India ramah pawh MGNREGA kalpui tha ber te zing a mi a nih thu tarlangin, Mizoram chuan lawmman pawh a lo lak fo tawh thu a sawi a. Tha tak leh dik taka hnathawhna chuan rah tha a chhuah mek thu tarlangin, zirchianna nei tura State dang atang a lo kal an awm chu lawmawm a tih thu leh hmalam hunah zirchianna nei tur tam zawk an lo kal a beisei thu a sawi a. Heng Team te hi Mizoram-ah a lo lawm tih sawiin, an hlawkpui ngei a beisei thu leh Mizoram in MGNREGA-a kalpui dan System tha lai te chu hawnpui a, hmang ve ngei turin a sawm bawk a ni.

He hunah hian Puducherry DRDA Minister AK. Sai J Saravanan pawhin Mizoram in duhsak taka an mikhualna ah lawmthu sawiin, Mizoram in tha taka MGNREGA Scheme an kalpui thei leh ‘100% target achievement’ a nei thei chu RD Minister thawhrimna leh inpekna a ni tih a sawi a. Mizoram in MGNREGA a kalpui dan tha tak takte chu Puducherry-ah pawh hman ve ngei anih theih nan theihtawp a chhuah tur thu a sawi bawk.

He hunah hian Ethel Rothangpuii, Joint Secretary (RD) kaihhruaiin Mizoram in MGNREGA Scheme-a kalpui dan zirhonna neih nghal a ni a, Rural Development-a Addl. Secretary Irene Lalhlimpuii hnen atangin Mizoram in MGNREGA Scheme-a kalpui dan leh Mizoram dinhmun te ngaihthlak a zirhona neih a ni a. Zirhona atanga alan danin tun dinhmunah MGNREGA chu Mizoram khua (Gram Panchayat) 866-ah kalpui mek a ni a, Job Card 2,14,384 pekchhuah tawh niin MGNREGA hnuaia inhlawh thin mi 2,29,685 an awm mek a ni. MGNREGA hnuaiah hna 18,945 tan tawh niin heng zinga hna 13,887 chu zawh tawh a ni a, hnathawh zawh tawh zat hi za zela 73.3 a ni.