Oil Palm atangin cheng nuai 700 chuang lalut

Kolasib leh Mamit District-a Oil Palm chingtute chuan kum kalta chhung khan Oil Palm atangin cheng nuai 700 chuang an lalut.

Godrej Agrovet Ltd. te enkawlna hnuaiah Kolasib leh Mamit District-ah hian kum 2005 vel atang khan Oil Palm chin tan a ni a, tun dinhmun ah heng District pahnih a Oil Palm chingtute hi chhungkaw 1000 chuang an ni a, a taka Oil Palm tharchhuak mek chu chhungkaw 600 vel an ni. Oil Palm tharchhuaktu kuthnathawktute hian kumtin Oil Palm atangin sum tam tak an lalut mek a, nikum 2022-23 chhung khan Oil Palm rah (FFB) quintal 57,360 tharchhuakin, Oil Palm rah hralhna atangin Rs. 705, 52,800 an leichhuak a, Oil Palm tharchhuah te hi loneitute chuan an huan atanga a dahkhawmna hnai berah dahin Godrej Agrovet Ltd. a thawktute chuan an buk sak mai bakah, Mizoram-a Oil Palm Mill awmchhun, Bukvannei-ah her turin an dah sak vek thin bawk a ni.

Central sawrkar in Oil Palm beihpui a thlakna, NMEOOP Scheme a kalpui mek avanga Oil Palm rah man sang zel avangin Kolasib leh Mamit District-a Oil Palm ching mek te chuan Oil Palm huan zauh belh turin hma an la a, Oil Palm la ching ve lo kuthnathawktu tam takin Oil Palm huan siam turin thuneitute hnenah an inziak lut mek bawk a, Oil Palm tiak phun tura Nursery siamtu Godrej Agrovet Ltd. hotute sawi danin, Oil Palm tak demand pawh a sang hle a, tun dinhmunah Mamit District ah phei chuan Nursery-a Oil Palm tiak an neihin a daih dawn lo niin an sawi a ni.