P&E Minister ho in Electrical Safety Day hmang

Power & Electricity enkawltu Minister R. Lalzirliana chuan nimin khan ‘Electrical Safety Day’ chu Bawngkawn South Cultural Centre-ah a hmanpui.

P&E Department buatsaiha Electrical Safety Week hman ah hian P&E Minister chuan Power & Electricity Department chu Electric current kaihhnawih ah reng reng mawhphurtu an nih angin, a pekchhuahna lam bakah, a inven fimkhurna lamah pawh a thawktu zawng zawng ten tihtak zeta hun leh tha leh rilru an sen a tul thu te a sawi a. Indian Electricity Rules leh Rules & Guidelines neih dang te a hre-chiang ber te an nih angin tun aia uar zawkin heng dan leh hrai te chu puanzar a tul thu a sawi bawk.

Finance Department in kum 2022-2023 chhunga P&E Department sum thawkchhuak tura a tuk (Revenue Target) chu cheng vbc. 600 niin Department in hemi chhunga Eng chhiatna leh thil dang atanga sum an lakluh chu cheng vbc. 737 a ni thung a, za zelah 122 in an target hi an khum a. Chutih laiin Joint Electricity Regulatory Commission (JERC) in hemi hun chhung veka Revenue Target thawkchhuak tura a beisei chu cheng vbc. 403 a ni ve thung.

Nimin-a he hun hmanna ah hian kum 2022-23 chhunga Sub–Division hrang hrangte tana inelna buatsaiha lawmman sem nghal a ni a. Sum chhunluh lamah thawk tha ber chu Revenue Sub-Division-II Aizawl niin cheng vbc. 157.77 an thawkchhuak a. Hmanrua leh thil dang avanga Sub-Station atanga consumer-te hnena kawl-petha a thlen thlenga hlohna hrang hrang Technical & Commercial Loss (AT&C Loss) tihtlem kawnga thawk tha ber Champhai Rural Sub-Division niin kum 2022-2023 chhungin Transformer pakhat mah an tichhe lo Sub-Division panga (5) an awm bawk a ni.