New Serchhip South VC te Futsal Ground siam mipuite hman theih tura khuh hawn a ni

New Serchhip South Village Council in Pioneer Camp hlui hmuna Futsal Ground an siam chu peihfel niin nimin tlai khan a khuhhawnna neih a ni.
He Futsal Ground khuhhawnna puala inkhawm VC Vice President Lalthuamliana kaihhruaia neih ah New Serchhip South VCP Rengliana chuan VC inthlan dawnah Manifesto te an siam angin he Futsal Ground siam tur hian hmalak a nih thu leh a tirah ni 100 inhlawhna atang ten hma an lak thu a sawi a. VC ten lungrual taka hma an lak bakah khawtlang mipuite pawh an lungrual avangin tunah hian hman theih tura peihfel a nih tak thu a sawi a. Amaherawh chu hmalakna tur erawh ala tam thu sawiin, hei vang hian a hawnna tak tak la nei lova a khuhhawnna chauh neih a nih thu leh he Futsal Ground hi VC ten sum lakluhna atan leh chu sum chu mipuite tana rawngbawlna zau zawk a awm theihna tura ruahman a nih thu a sawi a ni.


He hunah hian New Serchhip South VC Member H. Lalliana chuan hunserh hmangin VC Secretary Ramdinmawia Ralte chuan Futsal Ground siam tura hma an lak dan a tarlang a. New Serchhip-a Pioneer Camp hmun hlui chu Zawl zau fe awmsa a nih avangin Ground siamna atana hmang tur hian Land Lease te siamin March 1, 2022 khan sum awm ang ang hmangin khawl hmanga a laihzauh leh siamrem hna thawh tan a nih thu a sawi a. A chhuat hi PCC Slab chhun a nih hnuah Ground hi a dung meter 42 leh a vang meter 28-a siamin thir hmangin ft. 15-a sang in hung chhuah vek a nih thu a sawi a. A khelmual bik hi a dung meter 40 leh a vang meter 20 niin hei hi Artificial Turf (Grass) phah a ni a, khawthlang lamah entu mipui mi 100 chuang thut theihna turin Gallery siam a nih bakah Official Pavillion a dung ft. 24 leh a vang ft. 10-a zau in siam a ni bawk. Hei bakah hian zan lama inkhelh theihna turin LED Light, watt 100 chu 18 dah a ni bawk a, Power Supply khaihlak changa hman theih turin Generator 3.5kVA lei a ni bawk.

Ground siamna atan hian Rs. 53,88,000/- hman niin sum hmuhna lian an neih loh avangin MRB New Serchhip Branch-ah Loan cheng nuai 15 an lak thu te; Mimal leh pawl, Sawrkar Department leh a duh apiangte tan hman theih niin zing dar 5:00 atanga tlai dar 5:00 chhungin darkar khat zelah Rs. 500/- leh tlai dar 5:00 atanga zan dar 11:00 thlengin darkar khat zelah Rs. 1000/-in hman theih a nih thu te, Naupang kum 15 hnuailam tan sawrkar chawlh leh Inrinni Zing dar 10:00 leh chawhnu dar 3:00 inkarah Booked an awm loh chuan darkar 1-ah Rs. 200/- in hman theih a nih bakah Pawl leh mimal anga nikhata/zankhat a darkar 5 chunglam hmang te chu darkar khat a thlawna hman tir an nih tur thu te an tarlang bawk a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar