IFMIS kaltlangin Sawrkar in hlawh pechhuak mek

Serchhip-a District Treasury Office chuan Integrated Financial Management and Information System (IFMIS) kaltlangin sawrkar hnathawk te hlawh pekchhuah mek a nih thu an sawi.
Nimin-a LENKAWL zawhna chhangin Serchhip-a District Treasury Officer Alvina Ramdinthari chuan IFMIS hi kum 2020 chho vel atang khan kalpui tan a nih tawh thu leh a theih anga inbuatsaihna te pawh kalpui a nih thu sawiin, Training te pawh lo neih tawh thin a nih thu a sawi a. Amaherawh chu hmang ngei ngei tura tih a nih loh avangin thawktu thenkhat te chu an lo inthlahdah leh deuh thu sawiin, tun thla (April, 2023)-a March (2023) thla hlawh siam turah chuan IFMIS hi hman ngei ngei a tul tak avangin sawrkar Department tam taka thawktu ten harsatna an tawh tak thu a sawi a ni.

Serchhip Treasury Officer chuan Department thenkhat ten harsatna an tawh sutkian a nih theihna tur hian an Office-ah IFMIS Support Engineer an awm thu sawiin, rawn pan te pawh an awm ve reng thu leh DDO 49 an neih te zingah IFMIS kaltlanga hlawh tifel thei te chu sum pawh pekchhuah nghal zel an nih thu a sawi a, tunah hian Department 10 vel chu tihfel a nih thu sawiin, nimin-a hemi chungchang zawh a nih lai hian engemaw harsatna avangin tihfel tawh zat hi hriat theih a ni lo thung.

IFMIS hi Hlawh leh Contingency Bill ah te hman a nih tawh thu Treasury Officer chuan sawiin, he ruahmanna hi sawrkar sum hmanral thin khuahkhirhna atan pawh thil tangkai tak tur nia a hriat thu a sawi a. Sum hman dan chu langtlang taka kalpui a nih tawh dawn thu leh tihsual palh awm thin te pawh awlsam te-a hmuhchhuah theih a nih tawh dawn thu te a sawi bawk a ni.