Latest News

Champhai-ah Urban Primary Health Centre hawng

Champhai Vengthar-a Champhai Urban Primary Health Centre (UPHC) thar chu nimin khan Health Minister Dr. R. Lalthangliana chuan a hawng a, hriselna kawnga Champhai khawpui mamawhna phuhru tura Urban PHC hawn a ni chu lawmawm a tih thu sawiin, tunah hmun nghet la nei lo mah se hmunhma nghet building thar nena UPHC Champhai kalpui a nih theih nan hmalak zel a ni tih a sawi bawk.

Khawpuia cheng harsa zualte pan theih turin India ram khawpui dangte ang lovin tlangram bik tan In 30,000 chin tan Urban PHC pakhat zel din theih a ni a, tuna hawn tak Champhai Vengthar a mi hi kumin April 1 khan kalpui tan niin tunah hian Doctor 1, Staff Nurse 3, Health Worker 2, Group ‘D’ 2 leh Pharmacist, Lab. Tech leh Accounts Clerk mi pakhat theuh an awm a ni.

Champhai Urban PHC-ah hian khum 6 awm mekin, OPD, Laboratory, Immunization, NCD leh Program hrang hrangte kalpui a ni a. Chhungkua 6881-a mihring 34,333 bakah Urban ASHA 7, Sub-Centre 6, Mahila Arogya Samity 6 leh Anganwadi Centre 44 te a huam mek a ni. He huna tarlan a nih dan chuan din a nih atanga nimin thlengin Champhai Urban PHC-ah hian OPD Case 5430, damlo admit 23, Lab. Test 2367, Outreach tum 11 atangin mi 704 te hriselna enfiah a ni a, Specialist tum 14 tlawh atangin damlo 454 te enkawl an nih bakah mi 155 te hnenah hri danna pek a ni tawh bawk.

Health Minister hian Champhai Venglai a Health & Wellness Centre pawh nimin khan tlawhin, thuamthat leh tih changtlung kawnga hmalak tulte a enfiah a. Hemi hmalam hian Khawzawl District Hospital tlawhin, Sawrkar hmalakna kal mek a hmunah a thlir nghal bawk a ni.

Comments

Popular News (Last 30 Days)