Discretionary Fund atangin hmun 3-ah tanpuina hlan

Mizoram Larsap in Discretionary Fund a pekchhuah hmangin nimin khan Serchhip-a mi-dangte tana rawngbawlna hna thawhna hmun pathum-ah tanpuina Rs. 25,000/- theuh hlan a ni.
Heng tanpuina te hi Serchhip District Bawrh-sap Nazuk Kumar IAS chuan Adult Rehabilitation Centre (ARC), Beiseina In (Old Age Home) leh Shalom Special School te hnenah kalchilhin a hlan a, Serchhip SDC F. Lalnisai chuan Bawrhsap hi tawiawmin heng hmunah te hian Bawrhsap chuan Larsap hnen atanga sum leh a pekna tur ruahman an hmuh angin hlan a nih thu a sawi a ni.

Ruihhlo ngai te enkawlna hmun ARC Chhiahtlang hi mi 10 awm theihna niin mi 10 leh a aia tam an awm deuh reng tih a enkawltute chuan Bawrhsap hi an lo hrilh a, tunah hian mi 10 dah belh theihna tur Building an siam mek thu leh mi pakhat hi thla li (4) zel awm tura an ruahman thu an sawi bawk. Old Age Home enkawltute hian an Home hi mi 10 awm theihna tura an ruahman ni mah se an tawt deuh thu an sawi a, tunah hian mi 7 an awm mek thu leh an zinga tam zawk hi Serchhip khaw pawnlam mi an nih thu Bawrhsap hi an hrilh bawk a ni.

‘Rualbanlote School’ tia hriat lar Shalom Special School enkawltute chuan kumin ah Admission an la tih thar loh thu sawiin, tunah hian naupang/zirlai mi 32 an neih mek thu an sawi a, School-a thawk mi 2 an neih thu pawh sawiin, heng mite hian a hrana hlawh an neih loh thu an sawi a. An School chhuat tlahniam chu Bawrhsap hian a siamthatna tur Estimate lo siam tir tur leh a hnena thehlut tura tiin School a kal tur hruaina atana Petrol an mamawh thu leh mamawh dang an neih te an lo thlen bawk a ni.