Tlangpui/Tlangmawi Water Supply Scheme hawng

PHE Department changtu Deputy Chief Minister Tawnluia chuan nimin khan cheng nuai 551 senga siam nizung chakna hmanga Tlangpui/Tlangmawi khua te tana tui lakna chu a hawng.

Tlangpui/Tlangmawi Water Supply Scheme (Solar Pumping) hawnna puala inkhawm Tlangpui Community Hall-a neih ah Deputy Chief Minister chuan Tlangpui leh Tlangmawi khua ten tui in tur thianghlim hnianghnar taka an tlan thei tawh tur chu a lawmpui thu leh Thal-ah pawh tui harsatna an tawk lo turah a ngaih thu leh In tinin tui litre 38 tal an nei thei vek tura ngaih a nih thu a sawi a. Tui hi renchem tak, daihzai tak siin a hman theih tih kan hriat a tul thu a sawi bawk.

Tlangpui leh Tlangmawi khua chawmtu tur Ni zung chakna hmanga tuilak hi Jal Jeevan Mission (JJM) 2021-2023 hnuaiah cheng nuai 551 senga thawh niin, July ni 26, 2021 atang khan thawh tan a ni a, December ni 26 2022-a thawh zawh hman tura ruahman niin December ni 16, 2022 khan thawh zawh a ni a; heng khaw pahniha In tinah tui hi pipe hmanga pek vek a ni. Tlangpui khua ah hian In 169 awmin mihring 1000 vel an cheng a, Tlangmawi khua ah hian In 48 awmin mihring 250 vel an cheng bawk a. He project hi mihring 1373 leh chhungkaw 228 chawm zo tura ruahman a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man