FCSK in hnehna in bul an tan
Mizoram District hrang hrangte Football-a inelna, MFA Cup 2023 hi tunkar Thawhtanni atang khan Khawzawl-ah khelh niin Serchhip District aiawha kal FC Serchhip Kawnpui hian nimin khan Group B-a an match hmasa ber khelin Mamit District aiawha kal Field Veng FC mamit an hmachhawn a, 5-1 a hnehna changin Group Match tha takin bul an tan a ni. He inkhel ah hian FC Serchhip Kawnpui hian minute 44-na ah V. Lalremruata goal khung hmangin hma an hruai a, minute 59-na ah Lianchampuia chuan an goal hnihna khung lehin Field Veng FC tan Lalrammuanpuia chuan minute 64-na ah an si phurh a rawn sut then a. Amaherawh chu minute 67-na ah Field Veng FC player Lalnunpuia chuan an lamah tilutin FC Serchhip Kawnpui in 3-1 in hma an hruai zui a, minute 82-na ah Gospel Darthanmawia leh minute 83-na ah Felix Lalruatsanga ten FC Serchhip Kawnpui tan goal khung lehin harsa lutuk lovin 5-1 in hnehna an chang ta a ni.
FC Serchhip Kawnpui te hian naktuk-ah an match hnihna an khel leh dawn a, Lawngtlai District aiawha khel Lawngtlai Vengpui FC an hmachhawn leh dawn a. Lawngtlai Vengpui FC te hian nimin khan Saitual District aiawha kal Mel Veng FC Saitual chu 2-1 in an hneh lo a ni.
Mizoram Football Association (MFA) buatsaih MFA Cup 2023-ah hian Mizoram District 11 zingah Lunglei leh Siaha District an tel theih loh avangin District 9 an inel a, heng District 9 te hi Group 2-ah then niin Serchhip District hi Group B-ah Lawngtlai, Saitual leh Mamit District te nen an awm a, Group A-ah a thlengtu Khawzawl bakah Champhai, Hnahthial, Kolasib leh Aizawl District te awmin Group pahnih atang hian point hmu sang pahnih ve ve ten Semi Final an khel dawn a ni.
Comments
Post a Comment