Transport Minister in Mizoram mamawh a thlen

India rama State leh Union Territory (UT) hrang hranga Transport Minister-te intawhkhawmna neih ah Mizoram Transport Minister TJ. Lalnuntluanga chuan Mizoram mamawh hrang hrang a thlen.

Transport Minister te intawhkhawmna hi Union Minister of Road Transport & Highways Nitin Gadkari kaihhruaiin niminpiah khan New Delhi-ah neih a ni a, he hunah hian Transport Minister TJ. Lalnuntluanga chuan Lirthei fit leh fit lo endikna tur Aizawl Hlimen-ah Inspection & Certification Centre sak mek a nih thu leh changtlung zawka thuamthat a ngaih thu a sawi a; hei hi Union Minister chuan an lo enzui tur thu a sawi a. Hei bakah hian Vehicle Scrapping Policy chungchang tarlangin, Mizoram ang sum leh pai dinhmun la hniam taka lirthei neitute'n a thar lei lehna tura harsatna an tawh theih dawn avangin Vehicle Scrapping ti turte tana Incentive/Relief Measure siam turin a ngen a; Union Minister chuan ngaihtuahzui an tum tur thuin a chhang bawk a ni.

Hei bakah hian National Electric Bus Programme (NEBP) hnuaia Electric Bus kalpui dan tur programme Central-in a duang chu State-in tha a tih thu a sawi a. Mizoram ang tlangram-ah hmantlak a nih dawn leh dawn loh a zawhna chu Union Minister chuan a hmantlak tur thu leh a siamtu Company-te nen pawh hemi chungchangah hian Meeting koh leh vat a nih tur thuin a chhang bawk a ni.