Serchhip-ah kawlphetha avanga vanduaina thleng thei laka himna tura inzirtirna hun hman a ni

P&E Department Serchhip Power Division buatsaihin nimin khan Serchhip DC Conference Hall-ah 'Electrical Safety Day' hmangin kawlphetha avanga vanduaina hrang hrang thleng palh thei laka fimkhur dan tur kawng hrang hrang inzirtirna neih a ni.

Serchhip-a 'Electrical Safety Day' puala hun hman hi Serchhip District Bawrsap Nazuk Kumar IAS chuan hmanpuiin kawlphetha chu kan nitin khawsakna a thil pawimawh ber pakhat a nih tawh thu leh a tel lova kan khawsak hleih theih tawh loh thu a sawi a. Hei vang hian a hman danah kan fimkhur a tul thu leh chutiang atana inzirtirna hun buatsaih a ni chu lawmawm a tih thu a sawi a. Electrict laka fimkhurna chu mitin tan a nih thu leh kan ngaih pawimawh thara accident kan tawhloh nan kan fimkhur a ngaih thu a sawi a. Mitin in electrict bungrua kan kawlte chu a nihna hrechiangin a hman dan leh a fit dan turah a nihna ang taka kan hman a ngai tih sawiin, “Kan Inchhunga Electric Wiring te tha taka enkawlin kan endik fo tur a ni,” tiin Electric wiring hlui deuh tawhte chu a thar a thlak thin a pawimawh thu leh hmanraw tha leh rintlak chauh hman a pawimawh thute a sawi a. Vanduaina thleng palh thei laka naupang zawkte an fimkhur theih nan Electric man a hlauhawm zia te zirtir fo a tul thu sawiin, Current in mi a lo man palh anih pawhin fimkhur taka chet lak dan turte chu naupangte hnenah kan zirtir tel a ngai tih a sawi a, Electric Department-a thawktute chu an hnathawhna kawngah fimkhurna ngai pawimawh hmasa ber turin a chah bawk.

He hun kaihruaitu P&E Serchhip Power Division-a Sr. EE, Er. Laldawngliana chuan kawlphetha chu mihring khawsakna atana thil tangkai leh kan khawsak ti awlsamtu ni mah se vanduaina tam tak thlentu a nih theih avangin fimkhur a tul thu leh hei vang hian Electrical Safety Day hi April 28-ah hman a nih thu a sawi a. P&E Department a thawk leh Power hmangtute ah tawhsual an tawh palh theih bakah vanduaina tak tak thleng palh thei a nih thu sawiin, thawktute chuan theihtawp chhuaha inzirtirna an kalpui thu a sawi a. Kawlphetha kaihhnawiha vanduaina a lo thlenin sawrkar in a tuartute tan zangnadawmna te pe thin bawk mah se sum leh pai in mihring nunna a lakkir theih loh avangin fimkhur hmasak phawt chu thil pawimawh hmasa a nih thu a sawi bawk.

Serchhip-a 'Electrical Safety Day' hman ah hian Serchhip Sub-Station Sub-Division a SDO Er. Lalhruaitluanga chuan Electric avanga vanduaina thleng thei pumpelhna tura mipuite hriat tur pawimawh hrang hrangte a tarlang a. Heng zingah hian Electric Bulb leh thlak ngai dang kan thlak dawnin Electric Off hmasak thin tur a nih thu te, hmanraw tha leh rintlak ngei kan hmun thin a pawimawh thu te, Electric chhia a lo awma kan siam dawn a nih chuan Plug ah Off hmasak zel tur a nih thu te a sawi.

Heng bakah hian Welding Machine leh Thir tanna leh thildang-a Electric tek chuai chuai chu Mit tichhe thei a nih avangin a venna tur te ngaih pawimawh tur a nih thu a sawi a. Electric On tur reng rengin Plug en chung ngeia on thin tur a nih thu te, kangmei chhuak a awmin Electric nena inthlunzawm a nih chuan Off hmasak ngei ngei tur a nih thu leh Electric kaihhnawiha kang-mei chhuak te Tui hmanga thelh tur a nih loh thu te, Pipe hmanga tui lakna leh Electric Line te insi thei ah a awm tur a ni lo tih te a sawi a. Petrol leh Gas te chu awlsam taka kangmei tichhuak thei a nih avangin hmun him-a dah tur a nih thu leh Switch-ah thil kan zawm/vit lut leh phawi dawn reng rengin off hmasak ngei thin tur a nih thu te a tarlang bawk a ni.