Thenzawl-ah P&E Minister hovin NERPC Commercial Coordination Sub-Committee thutkhawm nei
He thutkhawm hawnna hunah hian P&E Minister chuan Mizoram in hetiang thutkhawm pawimawh a thleng chu lawmawm a tih thu sawiin, Palai lokalte hlim tak leh hlawk taka hun hmang tura a duhsak thu a sawi a. Electricity hi mitin mamawh thil pawimawh a nih avangin Power Supply hnianghnar neih kan mamawh thu a sawi a. Mizoram sawrkar pawhin mipuite mamawhna phuhru turin Power siamtu Company te nen indawrna kalpui rengin, kumtin Power Supply engemaw zat kan lei thin thu a sawi a. Heng Power kan leina sum leh pai pek thu ah hripui vang ten harsatna te tawk mah ila tunah chuan hripuite kiangin, Power man pek thu ah nasa lehzualin kan insawrbing thei tak thu leh hma pawh kan sawn thu sawiin, theihtawp an chhuah chho zel tih a sawi. P&E Minister chuan Green Energy siamchhuahna lamah India sawrkarin nasa takin hma a la tih pawh he hunah hian tarlangin, National Green Hydrogen Mission tihhlawhtlinna kawngah India hmarchhaka kan Engineer ten ruahmanna leh hmalakna tha tak tak an neih ngei a beisei thu thu leh NE States te pawhin thil tam tak kan tithei a ni tih hre turin kalkhawmte chu a chah bawk.
P&E Minister chuan Mizoram in kawlphetha MW 29.35 siamchhuahna Hydel Power Plants kan nei thin tih pawh sawiin, nikum ah MW 5 pechhuak thei tur Tlawva HP leh MW 4 pechhuak thei tur Kawlbem HP neih belhin, Solar Power Plant pawh Tlungvel-ah MW 2 siamna kan neih thu te, MW 20 siamchhuak thei Vankal-ah kan neih tawh thu leh tun thla ni 25 hian hawn a nih dawn thu a sawi a. MW 10 pechhuak thei tur Solar Plant thar pahnih, Keifang-ah leh Thenzawl-ah din tum mek a nih thu sawiin, Hydel Project pawh engemaw zat kalpui mek kan nei tih a sawi a, a bikin tunah hian MW 24 pe thei tur Tuivawl-ah leh Tuirini-ah sawrkar a insawrbing mek a. CPSU hmalaknain MW 76 pechhuak thei tur Mat Sekawi leh MW 460 pechhuak thei tur Koladyne-II bawhzui mek reng a nih thu leh Mizoram sawrkar inbuatsaihna tlangpui a tarlang bawk.
He thutkhawm hawnna hun hi P&E Department-a SE (Comml) Er. Benjamin L. Tlumte chuan kaihruaiin E-in-C Er. Lalhmingliani Hmar chuan Palai te lawmna thu a sawi a. Kum 1962 ah Mizoram-ah a hmasa ber atan Aizawl chuan Power Supply hmu tanin, Diesel Generator hmanga siam a ni. Chuta tang chuan hma sawn zelin Vawiin ah chuan khaw 725-ah Power hi lakluh tawh a nih thu a sawi a, hemi enkawl tura thawktute dinhmun a tarlang bawk.
P&E Department E-in-C chuan Mizoram in hetiang Meeting pawimawh tak a thleng leh thei chu an lawm hle tih sawiin, kum 2015-ah khan an lo thlen tawh thu a sawi a bawk.
He hunah hian Nabarun Roy, Executive Director, NERLDC te, SM Aimol, Director, NERPC leh KB. Jagtap, Member Secretary, NERPC te pawhin thu an sawi bawk a. NE States hrang hranga Power & Electricity Department aiawhte, North Eastern Regional Load Despatch Centre aiawhte, NEEPCO aiawhte, Powergrid Corporation of India Limited aiawhte leh NTPC aiawhte telin chawhnu lamah Technical Session neih a ni.
North Eastern Regional Power Committee (NERPC) hnuaia Commercial Co-Ordination Sub-Committee hi Power lei leh hralh chungchanga NE States hrang hrang leh Corporations te indawr tawnna Committee pawimawh tak a ni.
Comments
Post a Comment