MAL in Book of the Year chawimawina hlan

Mizo Academy of Letters (MAL) chuan kum 2022 chhunga Mizo tawng Lehkhabu chhuak tha ber atana an thlan 'Daidanna Bang Phena Thuruk' tih ziaktu Dr. Zohmangaihi hnenah nimin khan chawimawina an hlan.

MAL hian nimin khan Central YMA Hall-ah an dinchampha lawmin he hunah hian 'Book of the Year, 2022' chawimawina hi a dawngtu hnênah he hun hmanpuitu Art & Culture Minister R. Lalzirliana chuan a hlan a, chawimawina thuchei (Citation) leh pawisafai Rs. 10,000/- chu Dr. Zohmangaihi hnênah hian an hlan a. He hunah hian Art & Culture Minister hian MAL member ziak lehkhabu 4 chu tlangzarhin Mizo tawng humhalh leh tihhmasawn chu hnam tana thil pawimawh tak a nih thu a sawi bawk.

MAL President, Prof. RL. Thanmawia kaihhruai he inkhawm ah hian Book of the Year thlangtu Committee Secretary, Dr. C. Lalawmpuia Vanchiau-in a tarlan dan chuan, kum 2022 chhung khan lehkhabu 203 a chhuak a, hêng zîngah hian hmun hniha thena hmun khat aia tam chu Christian Literature a ni a. Lehkhabu khâwn khawm zîngah hian bu 5 hi Myanmar rama chhut leh chhuah niin Tripura lam chhuak 2 a awm bawk. Hêng lehkhabu atang hian lehkhabu 36-ah insawrbing a ni a, chuta tang chuan Top 20 thlan leh niin Top 10 thlan leh a ni a, chuta tang chuan Top 3 thlan leh niin heng atang hian Dr. Zohmangaihi ziak 'Daidanna Bang Phena Thuruk' tih chu ‘Book of the Year, 2022’ atan thlan a ni ta a ni.