PMMSY hmalakna tur pawm

Nimin khan Serchhip DC Meeting Hall-ah District Level Committee on PMMSY chu an Chairman leh District Bawrhsap Nazuk Kumar hovin an thukhawm a, he hunah hian kum 2023-2024 leh 2024-2025 chhunga Serchhip District chhunga Fisheries Department hmalakna tur atana Action Plan an duan chu thlirho in an pawm a ni.
Heng kum 2 chhunga hmalakna atan hian cheng nuai 351.80 ruahman niin kum 2023-24 atan cheng nuai 159.00 leh kum 2024-25 ah cheng nuai 192.80 te a ni a, sum ruahman atanga za zela 54 chu sawrkar laipui tum tur niin tanpuina dawngtu tur (beneficiary) ten za zela 40 an tum ve anga, hei bak zaa 6 chu State sawrkar in a tum ve dawn bawk a ni.

Heng sum ruahman hmanga hmalakna tur an ruahman hrang hrang zingah hian Sangha Dil thar laihna tur te, Sangha note khawilenna tur atana hmalakna tur te, Buh chinna hmuna Sangha khawi tura hmalakna tur te, hun reilote chhunga hmun him zawka Sangha note thar-chhuahna (Biofloc Pond) siamna atana hmalakna turte, Sangha tharchhuah sa him leh thianghlim zawka phurhna tur (Insulated Vehicle) leh Sangha, Chakai, Kaikuang leh lui lam sa te thianghlim leh tuihnai zawka zawrhchhuahna tur In tê (Fish kiosk) sak te telh a ni.