YMA Inkhawmpui EF&CC Minister in a hmanpui

Environment, Forest & Climate Change (EF&CC) Minister TJ. Lalnuntluanga chuan nimin khan Champhai Sub-Hqrs. YMA Inkhawmpui vawi 8-na chu Champhai Ruantlang-a Vanhnuailiana Hall-ah a hmanpui.

Champhai Sub-Hqrs. YMA Inkhawmpui-ah hian EF&CC Minister chuan YMA member-te chu mahni intodelh tum tlat tur leh, mahni kutke a ding thei tura taimak chhuah turte, hlemhletna in a tihbuai ve loh mi nih tum turte a chahin, kut tling lova sum lakluh leh midangte atanga thil dawng tur ringawta indah lo turte in a fuih a. Chhungkua, ram leh hnam tana tih theih angte phak tawk chhuaha puitlin thei tura ngaihtuahna dik leh hrisel neih hmasak a pawimawh thu sawiin, kum sangbi tel lo changkang tawh hnamdang leh ram dangte nena intehkhin mai lova, an dinhmun ang leh a aia sang zawk thleng thei tura taima leh rinawm taka thawk tura ngaihtuahna seng zawk turin thalaite chu a sawm bawk.

Champhai Sub-Hqrs. YMA Inkhawmpui vawi 8-na hi April ni 18-20, 2023 chhung hian 'Ram Leh Hnam Humhalh' tih thupui hmanga neih a ni a, an Sub-Hqrs. YMA hi June ni 18, 2008 khan din niin Group pathum; Tuipuiral Group YMA, Vanhnuailiana Group YMA leh Vanapa Group YMA te an awm mek a, heng bakah hian thuthmun Branch 24 an awm mek bawk. Sub-Headquarters YMA Champhai huamchhung ah hian Branch 67 awmin YMA member Mipa 22,061 leh Hmeichhia 13,326, an vaiin member 35,387 an awm mek a ni.