Kum dang aiin temperature a danglam tam lo: Khawlum chhan boruak bawlhlawh vang

Mizoram Science & Technology Department-a thawktute chuan kumdang aiin kumin hian khaw lum dan a sang chuang lo niin an sawi a. Mizoram Pollution Control Board (MPCB) Member Secretary C. Lalduhawma pawhin tunlai khawlum chhan chu boruak bawlhlawh vang a ni ber tih a sawi bawk.

Mizoram Science & Technology Department-a Scientific Officer te chuan tun dinhmunah kum dang aiin kumin hian Temperature a sang viau chuang lo tih sawiin, “April thla hi khawlum hun a ni hrim hrim a. April ni 16-ah 33°C a kai a, chu chu kumin a a san ber ni a ni a. Kum danga a san ber ni ah 36°C te a ni thin a, kumin ah chutiang ang chu a la kai lo,” an ti a. Amaherawh chu Minimum Temperature erawh a hniam vak lo tih sawiin, April ni 9 atang khan 23°C chunglam vek a la ni a, khawvawh lai ber a 23°C chunglam vek a nih a vangin ruah a sur lo bawk nen, khua a lum tluang a ni ber,” an ti a, Nikum April thla a khaw lum lam tehna ah chawhrualin Minimum Temperature chu 20°C a ni a, kumin hian April thla ah 21.4°C a tling thung a. April 9 atang khan Maximum Temperature pawh 30°C a la tling vek bawk a. Khawchin thlirlawkna ah tunkar tawp lam hian ruah sur theihna chance awm mah se Mizoram puma sur tur ang erawh chuan a lang rih lo thung a ni.

Science & Technology hotute chuan a kum telin khaw lum a nasa chho zel a, nikum khan April 25 atangin 30°C a pel tan a, kumin ah erawh khaw lum chu intan hma hretin, April 9 khan Aizawl lum zawng chu 30°C-a ni tawh a. Nikum-a khaw lum ni ber, April 28 leh 29-ah 32°C niin niminpiah khan Aizawl-ah 33°C a ni a, nikuma a lum ni ber aiin a lum tawh zawk. State Meteorological Centre chhinchhiah danin kum 1985 atanga khaw lum ber kum chu 2017 kha niin hemi kum April 13-ah 36.5°C a ni a, chhinchhiah chinah Mizorama khaw lum ber a ni bawk.

Tunlai khawlum chu boruak bawlhlawh vang a ni ber tih Mizoram Pollution Control Board (MPCB) Member Secretary C. Lalduhawma chuan sawiin, “Van en i la, chhum kan hmu mang lo a, van paw thiang kak kan hmu mang lo a, a paw chuk a, chu chu meikhu leh boruak bawlhlawh inchawhpawlh a ni, Green House chhung a kan awm a, lum em em ta ang hi a ni,” a ti a. “Green House sarang angin, boruak bawlhlawh in min tuam a, ruah a sur si lo a, chhum hliahtu a awm si lo a, ni sa a lo kaltlang a, lumna chhuak leh turah a tawn chhuak zo lo a, van boruak paw chuk khian min tuam a, min up a, chu vanga lum chu a ni ber mai, temperature ah kumdang aiin a sang chuang em em in a lang lo,” a ti bawk.