Serchhip SP thar in MJA Member te kawmin mipuite nen thawhhona tha an duh thu a sawi
Serchhip SP Office Chamber-a an inkawmna ah hian SP thar Vanlalnghenga chuan tun thla ni 13 khan PTS Thenzawl-a Vice Principal atangin Serchhip SP hna hi a rawn zawm thu sawiin, ram leh khawtlang tana thawkho vek tur an nih avangin inhmelhriatna an neih theih nan inkawmna hun hi buatsaih an nih thu a sawi a. Serchhip chu ram laili-a awm a nih avangin Dan leh thupek kenkawh kawngah pawh thubuai ziahluh a tam loh thu leh hei hi mipui leh tlawmngai pawl te nen an thawhhona rah a nih thu a sawi a. Kumin kan hman tawh chinah Serchhip District-a Police Station pathum-ah thubuai ziahluh 31 a awm tawh thu leh heng zingah hian rukruk kaihhnawih thubuai chu 16 a nih thu sawiin, rukruk kaihhnawih thubuai te hi ruihhlo Heroin No. 4 nena inkaihhnawih te a nih thu a sawi a. Dan leh thupek kenkawh kawngah mipuite nen thawhhona tha an neih zel a beisei thu leh theihtawp chhuaha kan tan tlan chuan Dan leh thupek kenkawhna kawnga harsatna awm lo kan nih theih thu te pawh a sawi bawk a ni.
He hunah hian MJA Serchhip District President C. Lalhminghlua pawhin Serchhip SP thar in hetianga inkawmna hun tha tak a buatsaih chu lawmawm a tih thu leh Mizoram Police te pawhin nasa takin hma an sawn nia a hriat thu sawiin, tunhma deuha Police kan hriat thin te nen pawh kan hriat dan a tha zawnga a danglam nasat tawh thu a sawi a. He huna tel MJA Member te pawhin ruihhlo dona leh khawtlang mipui nun a ralmuan theihna tura hmalakna tur pawimawh leh tha nia an hriat hrang hrangte tarlangin, Serchhip SP chuan heng te hi a theih anga an lo enzui tur thu a sawi bawk a ni.
MJA Member te nen an inkawmna ah hian Serchhip SP hi Addl. SP Saidingliana Sailo leh Serchhip SDPO Kaste Romalsawma te chuan tawiawmin an hmalakna hrang hrang leh an dinhmun te an tarlang a. Khawtlang hmasawnna tura rawtna an neih hrang hrangte huamzau takin an sawiho bawk a ni.
Comments
Post a Comment