Pathian in pawl tha leh thianghlim YMA min pe hi a lawmawm - Er. Lalrinawma, Minister

Serchhip Sub-Hqrs. YMA Inkhawmpui vawi 7-na Chhingchhip Venghlun Khelmual-a neih mek chu nimin khan Tuikum Bialtu MLA leh Minister Er. Lalrinawma chuan khuallian niin a hmanpui a, Pathian in pawl tha leh thianghlim YMA min pe chu lawmawm a tih thu a sawi.

Chhingchhip Venghlun Khelmual-a Pandal sak 'Hrangliana Run' a Serchhip Sub-Hqrs. YMA Inkhawmpui nimin-a Vantlang Inkhawm ah hian Er. Lalrinawma chuan kan ram leh Hnam tana YMA pawimawhna chu sawifiah rual a ni lo tih sawiin, tlawmngai pawl lian leh member ngah ber, a hawina lam apianga hmalakna langsar tak nei thin a nih avangin hetiang pawl tha leh thianghlim Pathian in min pe chu lawmawm a tih thu a sawi a, “YMA hi kan ram leh Hnam himna kulhpui a ni,” a ti.

Er. Lalrinawma chuan ram leh Hnam humhalhna tur kawng hrang hrang a awm thu sawiin, “Pathian in ram leh Hnam min pe a, kan Hnam tan tihdan phung min pe a, heng te hi kan humhalh a ngai a ni,” a ti a. “Kan Tawng, tihdan phung leh nunzia te hi Mizote kan nihna tilangtu a ni a, heng te hi kan hluta kan vawnhim a tul a ni,” a ti bawk. Ram leh Hnam humhalhna atan thil pawimawh hrang hrang tarlangin, kan eizawnna atan kan Hnam himna ti derthawng thei kan thlan loh a pawimawh thu leh chumi ngaihtuah chung chuan thalaite pawhin eizawnna kan thlan a tul thu a sawi a. “Kan vel a hnathawh tur hnaivai hi thawk mai ila hnathawh tur hmuh loh a awm lo. Chu chu kan Hnam himna atan thil pawimawh a ni,” tiin Sawrkar phalna hnuaia thawh theih ah hna zahawm loh a awm loh thu pawh a sawi a, ei kan hmuhna leh chhungte chawmna atana kan hman theih hna chu hna zahawm a nih thu a sawi bawk.

Mizote kan inthlahpun nasat lehzual a tul thu pawh Er. Lalrinawma chuan sawiin, Mizote kan punna chu a tlahniam tial tial tih a sawi a, khawvel a Hnam ral tia kan sawi te chu an tlem vang a ni zel tih sawiin, “Mi tam takin ei leh bar harsatna chhuanlamin fa ngah an hreh thin. Nimahsela kan fate hi chawm tur Ka nen chauh an rawn piang bik lova, hnathawk thei turin kutke kimin an lo piang thin zawk a ni, chawm tur kan pungah ngai lo ila, thawktu tur kan pung zelah i ngai zawk ang u,” a ti a. “Kan hnam ziarang leh kan tawng hi a ral rualin keini hi kan ral ve nghal dawn a ni tih hriain kan hnamze tinte hi zahpui tur a ni lova, kan Tawng te hi hman tlem tial tial tur a ni hek lo. Kan chetze tinrengte kan uarin kan Tawng te hi kan zirna In-ah leh kan nitin nunah kan uar deuh deuh zawk tur a ni,” a ti bawk.

Social Welfare & Tribal Affairs changtu Minister Er. Lalrinawma chuan AIDS natna in kan ram nasa taka min run mek thu pawh sawiin, ngai ah kan nei mah mah tawh em nia a lan theih thu a sawi a. He natna laka kan him theihna turin mipat hmeichhiatna hman khawloh lakah kan fimkhur a tul thu a sawi bawk.

Nimin-a Serchhip Sub-Hqrs. YMA Inkhawmpui Vantlang Inkhawm hi an pawl Asst. Secretary K. Laltlanmawia chuan kaihruaiin zai leh lam te entir a ni a, chawhnu lamah Variety Programme hmangin Mizo Hnam Lam leh zai hrang hrangte entir a ni a, nizan khan ‘Kum-puan Inkhawm’ neiin Central YMA Vice President Lalhmachhuana chuan thuchah a ni.

He Inkhawmpui hi Vawiin hian chhun-zawm leh a ni dawn a, chawhma lamah khawmpui Palai ten ro an rel anga, chawhnu lamah kum 2023-2025 chhunga an hruaitu tur thlanna neiin zanin hian Palai thlahna Inkhawm neih zui nghal tur a ni ang.