IFMIS System-a fello tam tak awm vang niin sawi

Mizoram Pradesh Congress Committee (MPCC) chuan IFMIS hnuaia harsatna chu IFMIS System-ah thil fello tam tak a awm vang a nih thu an sawi.

Nimin-a thuchhuah an siamah MPCC Media Department chuan Mizoram-a sawrkar hnathawk tam takin hlawh an la lak theih loh chungchanga Finance Department insawifiahna ‘IFMIS hman thiam loh vang a ni’ tih chu Department hrang hranga hlawh siamtute an kawmnaah a dik tawk lo tih a lang niin an tarlang a. India rama sawrkar sum enkawl dan thar, Integrated Financial Management and Information System (IFMIS) hian harsatna tam tak a thlen ngei tih tarlangin, “Amaherawhchu, he harsatna hi Department hrang hrangte thiam loh ni lovin, IFMIS System-ah fel lo tam tak a awm vang zawk a ni a. Kum 2 kalta atanga he System hi hman tura tih a nih rualin, Vawiin thlengin system-ah fel lo a tam a, Portal a luh theih loh te, Approve theih mai loh te, luh hleih theih loh changte, bawhzui fe pawha Approve mai theih lohte a tam em em a. Hei hi Sawrkar thiam loh dik tak a ni a, a bikin Finance Minister Pu Zoramthanga’n mawh a phur lian ber a ni,” an ti.

Congress hunlai khan sawrkar hnathawk nghette hlawh lak theih loh a awm ngai loh thu leh sawrkar hnathawkten Congress sawrkar hnuaiah a hun taka hlawh an lak mai bakah GP Fund leh Bill hrang hrang hun rei tak tih khawtlai a awm ve ngai lo tih pawh MPCC chuan sawiin, “MNF sawrkar hnuaia hetiang taka Finance Management a buaina a thleng chho ta hi MNF sawrkar leh Finance Minister, CM ni bawk Pu Zoramthanga hlawhchham zia a tarlang chiang hle a ni,” an ti.