US Consulate General in Governor leh CM a kawm

Nimin khan Mizoram Governor Hari Babu Kambhampati chu US Consulate General, Kolkata (India)-a an hotu lu ber Consul General Melinda Pavek chuan kawmin ram pahnih te thawhdunna tur thil te an sawiho.

Raj Bhavan-a an inkawmna ah hian Governor chuan Consul General Melinda Pavek leh a naute chu Mizoram an rawn tlawh avangin lawmthu a hrilh a. US Palai Melinda Pavek-i hnenah hian Mizoram a rawn tlawh chhan leh a rawn ngaih pawimawh deuh te pawh a zawt bawk a ni. Consul General Melinda Pavek-i chuan Mizoram-ah sumdawnna kawngah thawhhona a awm em tih te Governor hi a zawt a. Hemi kaihnawih thilah hian Governor chuan Horticulture Sector (Bamboo Developments, Dragon Fruits,etc.,), Services Sector (Nursing, Healthcare & Paramedical Professions, Hospitality, etc.), Power Generation through hydroelectricity leh kawng danga Mizoram in hmalakna a neih mek chungchang leh a thlen chin te an sawidun a ni.

Governor chuan India sawrkarin Mizoram-ah hmasawnna ruhrel liantham tak – Rel Kawng siam leh National Highway tihlen hna te a thawk mek tih a sawi a. KMTTP a puitlin har deuh pawhin Rel Kawng leh National Highways siam hna te erawh thawh zawh thuai a ni dawn a. Hetih hunah hian kawng tinrengah hmasawnna liantham tak a awm dawn a, Mizoram hmelhmang a danglam dawn a, sumdawnna kawngah pawh tih tur leh thawh tur tam zawk a awm ngei ngei dawn a ni tih US Palai chu a lo hrilh bawk a ni.

Nimin vek khan Consul General Melinda Pavek hian Chief Minister Zoramthanga chu CM Bungalow-ah a kawm bawk a. US Consul General chuan Chief Minister hi ei leh bar, zirna leh environment lama Mizoram dinhmun chungchang te zawtin, Mizoram hmathlir te Chief Minister chuan a sawipui a. Thenawm ram Myanmar leh India inlaichinna te sawidun bawkin, khawchhak atanga ruihtheih thil lo thlengin khawtlang nun a nghawng dan te an sawi dun bawk.

Melinda Pavek-i chuan kumin March thlaa Mizoram in B20 meeting a thlen chungchang pawh sawipuiin, economy tihhmasawnna tur theihna (potential) Mizoram in tha tak a nei chu lawmawm a tih thu a sawi a. Entrepreneurship lama thalaite hmasawnna chungchangte an sawidun bawk a ni.

Hemi hnu hian US Consul General hian Health Minister Dr. R. Lalthangliana leh Chief Secretary Dr. Renu Sharma te a hran ve ve in a hmu leh bawk a. Mizoram dinhmun leh thawhhona tur hrang hrang te an sawi bawk a ni.