Latest News

SVAMITVA Scheme hnuaia Property Card semchhuak

India hmarchhak a Survey of Villages Abadi and Mapping with Improvised Technology in Village Areas (SVAMITVA) Scheme hnuaia Property Card semchhuahna hmasa ber chu nimin khan Phulpui leh Tachhip-ah te neih a ni.

Phulpui Vantlang Hall-a Property Card semna hun hi Revenue Minister Lalruatkima chuan khuallian nia hmanpuiin Property Card chu LSC nen a danglam loh thu a sawi a, dan anga ram neitu nihna mipuite hnenah a pek thu te, Property Card hmangin mipui ten awlsam zawka loan an lak theih tur thu leh zangnadawmna lak kawngah pawh VC Pass-in a huam ve loh ram hlutna ( land value) chhut tel a nih tawh tur thu te a sawi bawk.

SVAMITVA Scheme hi sawrkar laipui Ministry of Panchayati Raj hnuaia Central Sector Scheme a ni a. He Scheme hnuaiah hian drone hmangin thingtlang khuaa mihring chenna hmunte thlalak a ni a, thlalak hmang hian Property Card siam sak theuh an ni. Property Card kaltlang hian mipuite chu dan anga ram neitu nihna pek an ni a, hei hian ramri chungchanga buaina a tihtlem bakah khaw hmunhma ruahman (Town & Village Planning) leh Loan lak kawng ah te awlsamna a thlen beisei a ni. Sawrkar laipui-a Ministry of Panchayat, State sawrkar Land Revenue & Settlement Department leh Survey of India te thawhhona hnuaiah he Scheme hi kalpui a ni.

Tun dinhmunah Mizoram khua 319-ah he Scheme hi kalpui tura ruahman a ni a, khua 171-ah te Drone hmanga thlalak tan a ni tawh a. Hmarchhak state zingah Phulpui leh Tachhip te hi Property Card semchhuahna hmasa ber niin Phulpui-ah Card 166 leh Tachhip-ah Card 254, a vaiin 420 semchhuah a ni.

Comments

Popular News (Last 30 Days)