Governor in MZU-ah Mizo-ram Conclave a hmanpui

Zirna leh Zirna atana Digital hmasawnna chungchang NGO leh Khawtlang hruaitute nena sawihona ‘Mizoram Conclave on C20 : Education & Digital Transformation’ chu nimin khan Mizoram University-ah neih niin Governor Dr. Hari Babu Kambhampati chuan khuallian niin a hmanpui a ni.

Mizoram University leh Amrita University (Amrita Vishwa Vidyapeetham), Kerala tangkawpin an buatsaih he Conclave-ah hian Governor chuan MZU leh Amrita University te thawhdunna hnuaiah G20 hmalakna zinga pawimawh ber pakhat, tlawmngai pawl leh khawtlang hruaitute nena Zirna kawnga hmasawnna chungchang sawihona buatsaih a nih chu lawmawm a tih thu sawiin, India ram chu Digital Technology-ah hma a sawn nasa tawh hle a. Tunah hian 5G technology kan hmang tawh a, kum 2030 a lo thlen chuan 6G hman kan tum a ni, a ti.

Zirna huanga tunlai thiamna hman tangkai a pawimawh zia Governor chuan sawiin, Mizo-ram pawhin kan tanlakna tur a nih thu a sawi a, “Mizoram-ah eizawnna atan mi tam zawkin tlangram Lo neih kan hmang a; hei hi tunlai khawvel sik leh sa inthlak danglam nasa takah hian a hlawk loh mai bakah a him lo chho telh telh a. Zirna leh Technology lama thiamna kan bawh a, thiam bik thil eng engemaw neih kan tum a angai a. Education leh technology lam huang ah kan thalaiten an theihna sang tak hmang 

tangkaiin chhawr tlaka thiam thil an zirchhuah tam a pawimawh telh telh dawn a. Hetiang zawng hian kan eizawnna him tawh lo atangin a hlawk zawk leh him zawkah insawn kan tum tur a ni,” a ti bawk. He hun hi Chief Secretary Dr. Renu Sharma pawhin a hmanpui a ni.