Khawlum chho zel lirthei pun chak vangah ngai

Mizoram Pollution Control Board (MPCB) chuan Mizorama a kum tela khawlum chho chu lirthei pung chak lutuk vang leh enkawl that tawk loh avang a nih thu a sawi.

MPCB chuan boruak bawlhhlawh dan leh khawchin ngun taka a zirchian thinna atanga a lan danin khawpui boruak a bawlhhlawh nasa chho hle a, chu chuan sik leh sa-ah nghawng neiin khua pawh a lum zual hle nia a lan thu an sawi a, boruak bawlhhlawh dan tihlanna, Air Quality Index (AQI)-ah chuan Aizawl-ah January thla khan 65 a ni a, February leh March thla-ah 85 kai chhoin, April ni 10 atang phei kha chuan 100 chung lam kaiin 150 bawr vel a ni a, a san ber lai berin 216 a kai pha hial niin an sawi.

Nikum lam nen khaikhinin AQI hi a sang chho nasa hle tih pawh sawiin, tunhnaia boruak dinhmun hi AQI zat atanga en chuan Level-3 (Moderately Polluted Category)-ah a awm mek a, a tlangpuiin Good Category a awm thin a nih laiin boruak hi a bawlhhlawh chak ta tih an sawi.

MPCB hian thuchhuah siamin nikum lam nena khaikhinin khaw lum dan a danglam chho nasa hle bawk tih an tarlang a. Nikum April thla khan a lum lai berin 27.24°C a ni a, kumin April thlaah erawh chuan 34.16°C a kai tawh a. Nikum lam nen a san ber lai inthlauhna hi 6.92°C lai a ni tawh tihna a nih thu an sawi a. Sik leh sa inthlak danglam avang te, Thal khawro leh ruahtui tlak loh avangte leh chhan dang avangte in khua in lum lam a pan zel rual hian boruak tihbawlhhlawh hian khawlum a belchhah hle tih an sawi a. Boruak chhe zel tur leh khawlum nasa zual zel tur veng turin lirthei chelek tlem te, a hun taka Pollution Test tira boruak chhia a pekchhuah nasat loh nan lirtheite enkawl that te, boruak chhia eiral turin thing phun uar a, ramngaw humhalh te uar tur a ni tih an sawi a, ram tikang lo tur leh bawlhhlawhte hal lo turin mipuite an ngen tih a sawi bawk.