Cheng vbc. 500 in Aizawl cheithat hna thawk

Deputy Chief Minister Tawnluia chuan SMART City hnuaiah cheng vbc. 500 in Aizawl khawpui cheithat nan thawh mek a nih thu a sawi.

Ramhlun North Community Centre sak mek nimin zing-a a tlawhna ah Deputy Chief Minister chuan SMART City hnuaiah cheng vbc. 500 in Aizawl khawpui cheithat nan thawh mek a nih thu hi sawiin, SIPMIU kaltlangin Tanhril hnuai Setlaklui, tuna Aizawl khawpui tuilak aia tam zawk pump chhoh an tum mek thu leh am zofel tep tawh tih a sawi a. UD&PA chuan mipui mamawh chi hrang hrang, tunhmaa Department dang khawih thin ho te pawh hma tel vekin theihtawp an chhuah mek tih a sawi bawk.

UD&PA Department changtu ni bawk Deputy Minister chuan khaw 28-a hma an lak mek thu pawh sawiin, “MNF Sawrkar hian mipui vantlang tana tha tur thilah chuan theihtawp a chhuah mek a ni,” a ti a. “Khawtlang hruaitu ten ruahmanna leh rawtna an rawn thlente pawh ngai pawimawh zelin, tlawmngai pawlte nen inrawn-khawm chungin UD&PA Department chuan hma kan la thin a. Sawrkar nih vang ngawtin duh dan danin hma kan la ngawt ngai lo a ni,” a ti bawk.

Ramhlun North Community Centre hi Mizoram State Fund atanga thawh niin, a sak zawh nan sum sen ngai zat tura chhut hi cheng nuai 778.72 vel a ni a. Chhawng nga (G+4) awm tura ruahman niin Car Parking, Two Wheeler Parking, Chowkider Quarters, Restaurant, Health Sub-Centre, Meeting room, Local Council House,  Conference Hall, Badminton Hall cum Community Hall te awm tura duan a ni. Deputy Chief Minister chuan Ramhlun  chu Aizawl a Veng lian leh veng hlun, mihring pawh tamna a nih thu sawiin, Community Centre an nei thuai tur chu a lawmpui thu a sawi bawk.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man