Sub-Hqrs. YMA Inkhawmpui vawi 7-na zofelin kum 2023-2025 hruaitu thlanna neih a ni

Serchhip Sub-Hqrs. YMA Inkhawmpui vawi 7-na Chhingchhip Venghlun Branch a neih chu nizan khan a tiak ta a, nimin khan khawmpui Rorel Inkhawm leh kum 2023-2025 chhunga hruaitu tur thlanna neih niin President nilai Kawlthuama chu President atan thlan nawn leh a ni.

Serchhip Sub-Hqrs. YMA Inkhawmpui nimin a chhunzawm ah hian chawhma lamah an President Kawlthuama kaihhruaiin Rorel Inkhawm neih a ni a, YMA khawih Agenda 3 chu pawm vek niin YMA ten Mizoram Building & Others Construction Workers Welfare Board hnuaia inziaklut tura Labour Employment, Skills Development and Entrepreneurship Department-te an puihna ah Branch YMA te fimkhur takin kal nise, an thawkho zel dawn a nih chuan Central YMA ah thawhhona thuthlung nei turin hmalak ni tawh se an ti a, Serchhip District Hospital ah a mamawh ten a thlawna Kuang an hman theih nana hmalak an rel bakah Serchhip Sub-Hqrs. YMA a thawk tur Workers-cum-Driver lak rawtna te pawm a ni.


Sawrkar khawih Agenda 2 zingah Serchhip Kikawn kaltlanga Sailam kawng siamthata cheithat a nih theih nana sawrkar-a thlen chu pawm a ni a, The Mizoram (Land Revenue) Act 2013, Tribal-in Non-Tribal hnena Inhmun lo ram hralh leh pek khapna dan khauh taka hman a nih theih nan Central YMA in hma la rawh se tih chu Central YMA hmalakna kal mek a nih thu tarlan a ni bawk. Hei bakah hian kum 2023-2024 Serchhip Sub-Hqrs. YMA Budget atan Rs. 9,65,500/- chu pawm a ni bawk a. Kum 2022-2023 chhunga Serchhip Sub-Hqrs. YMA-a YMA Member boral mi 252 te sunna hun hman a ni bawk.

Nimin chawhnu lam khan kum 2023-2025 chhunga Serchhip Sub-Hqrs. YMA hruaitu tur thlanna neih niin President-ah Kawlthuama (Serchhip Kâwnpui North Branch); Vice President-ah PC. Vanlalluna (Chhiahtlang Zotuithiang Branch); Secretary-ah K. Laltlanmawia (Serchhip Chhekhnai Branch); Asst. Secretary-ah Lalrinmawia (Serchhip Chanmari Branch); Treasurer-ah Zolianmawia (Serchhip Vengchung Branch) leh Fin. Secretary-ah H. Lalbiakhlua (Serchhip Hmar Veng Branch) te thlan an ni.

Serchhip Sub-Hqrs. YMA Inkhawmpui vawi 7-na hi nizan khan Sub-Hqrs YMA Vice President Lalrammawia kaihhruaiin Palai Thlah Inkhawm neiin zawhfel a ni a, he hunah hian hruaitu thlan thar te inhmelhriattirna neiin President thlan thar Kawlthuama chuan thuchah a sawi bakah Palai Thlahna thu sawi ngaihthlak a ni a, Serchhip Sub-Hqrs. YMA Zaipawl Music Video siam thar chu tlangzarh nghal a ni bawk.

Comments

Popular News (Last 30 Days)

LPG man bithliah thar