Keitum - Artahkawn inkar Tuichang lui-a Lei dawh thar Chief Minister in a hawng

Keitum leh Artahkawn inkar Tuichang lui-a cheng nuai 1014.20 senga Lei dawh thar chu nimin khan PWD changtu leh Chief Minister Zoramthanga chuan a hawng a, he Lei hi Central Roads Fund (CRF) leh Special Assistance to States for Capital Investment (SASCI) atanga sum hmuh hmanga dawh a ni.

Nimin-a Lei dawh hawnna puala Inkhawm Tuichang Lei-a neih ah Chief Minister Zoramthanga chuan Tuichang lei hawn tak chu Tuichangral chhak leh thlang mite inkalpawhna pawimawh tak a nih thu sawiin, hawn a ni ta chu lawmawm a tih thu a sawi a. Lei dawh awm hmasa chu 10MT chauh dawl zo a nih avangin lirthei lian leh rit zawk an kal theihna tur Lei lian zawk mamawh a nih thu a sawi a. Lei thar dawhna ah harsatna eng engemaw tawkin, Lei design chu thlak a ngaih avanga Central Roads Fund atanga sum hmuh in Wingwall atan Provision siam a lo nih loh avangin Sawrkar ah a zawhfelna tur sum SASCI atangin cheng nuai 259.45 dah belh a nih thu a sawi a ni.

Chief Minister chuan Mizoram-ah hman tangkai theih ram zau tha tak kan neih thu te, chhim leh hmar zawnga luang lui tam tak kan neih thu leh sik leh sa pawh nuam tak, ruahtui tha bawk si kan nei te hi kan vannei takzet tih a sawi a. Hman-a kan pi leh pu te an rawn thlangtlak a helai hmunah awm hmun nghet an rawn khuar dan te, Kristianna rawn luh dan te, rambuai kan tawh chhoh lai leh tun kan dinhmun hi chhan nei vek a thil thleng nia a ngaih thu sawiin, Hnam a kan chian a, ram hmangaihna thinlung nen hma kan sawn a, midang tan malsawmna kan nih theihna tura Siamtu ruahman a nih ngei a rin thu a sawi a. Chuvang chuan mitin kan zawn theuhah dikna nen, thil tha zawk thlang zelin kan tih theih chin thawk zel turin he huna kalkhawmte chu a sawm a ni.

PWD Joint Secretary Lalhmasaa kaih-hruai he hunah hian khual zahawm, Bialtu MLA leh Home Minister Lalchamliana chuan kum 2016 atanga dawh tan tawh he Lei dawh hna hi zawhfel hun an nghakhlel hle tih sawiin, mipuite hman theih tura hawn a ni ta chu lawmawm a tih thu a sawi a. Kum 2018-a MLA inthlanpui neih lai khan an bial chhunga kawng te chu a chhe hle tih sawiin, tunah chuan PWD te hma-lakna in kawng te hi a tha ta hle tih a sawi a. Tunah hian Keitum leh Zawlsei inkar kawng laih tum mek a nih thu leh hei hi kawng awmsa aiin km 30 vela tawi tura ngaih a nih thu a sawi bawk.

Nimin a hawn tak Tuichang Lei hi a tirah Double Lane PSC Girder Bridge tura ruahman niin M/S Sadguru Engineers & Allied Services Pvt. Ltd. chu Contractor an ni a, December 1, 2016-ah dawh tanin December 1, 2018-a zawhfel tura ruahman a ni a, hna thawh tan a nih hnuah a laia dotu tur ban phunna chungchang ah harsatna thlengin hna hi thawh chhunzawm zel a nih chuan a bula Lei awmsa tan a hlauhawm theih dawn avangin hna hi tihtawp lailawk a ni a. Ruahmanna hi thlakin a lai-a ban awm lo (Single Span) ni tura ruahman leh a ni a, hei vang hian a zawh hun tur pawh December 1, 2019-ah sawn a ni a. Amaherawh chu hri leng avanga hna kallai hi nasa taka khaihlakin March 31, 2023 khan thawh zawh a ni ta chauh a ni.

He Lei, Double Lane Built-Up Steel Girder Bridge hi a tirah Central Road Fund (CRF) atanga sum hmuh cheng nuai 754.75 senga dawh tur ni mah se ruahmanna te thlak a nih avangin SASCI atangin cheng nuai 259.45 ruahman belh leh niin a vaiin cheng nuai 1014.20 sen a ni ta zawk a. He Lei hi meter 68-a thui niin meter 7.50-a zau niin a ruala lirthei pahnih tlan theihna tur leh Tonne 100 dawl zo tur a ni.